Winok
From Wikipedia, the free encyclopedia
Winok (° tusschn 640 en 650 - † 6 november 717) wos e zeune van keunienk Domnoneus Judaël van Bretagne en keuniginne Pritella. En is de patrôon van de meulenoars en van 't Frans-Vlamsche Sint-Winoksbergn (in 't Frans verkort noa Bergues), 't stadje da noar hem vernoemd is.
Winok was êest monnik in Sithiu ('t loatere Sint-Omaars) ounder abt Bertinus, die hem loater, in 685, noa Wormhout zound vo doar een nieuwe klôostervestigienge te begunnen. Winok was doa meulenoare en 'n is doa loater ook begroavn.
In 1024, achter de vernielienge van d'abdye van Wormhout deur de Vikiengs, liet Boudewyn met den Board een nieuwe Benedictynabdye bouwn in Sint-Winoksbergn. De reliekn van den heilign zyn van Wormhout noa de kerke van Sint-Omaars overgebrocht en loater, os de kalmte weregekêerd was, noa Sint-Winoksbergn.