Pietro da Cortona

Pietro da Cortona, echte noame Pietro Berrettini, (Cortona, 1 november 1596 - Rome, 16 meie 1669), was tegoare me Caravaggio, Gian Lorenzo Bernini en Francesco Borromini êen van de belangrykste Italioansche kunstenoars binst de barok.

Santi Luca e Martina, Rome (1635-1650)

J’is surtout bekend vo zyn plafongfresco ’s en, olhoewel dat architecteure vor hem mor ip de twidde plekke kwam, en je ‘t mo zag ols ’n hobby, wast ’n êen van de grotste architectn van zyn tyd.

Zyn leevn

Pietro da Cortona is geboorn in Cortona, ton e stad in ‘t Grôothertogdom Toscane. Je studeerdeg’ êest in Firenze en je lêerde zyn methodes surtout ip zyn eign.

Paus Urbanus VIII (1627) deur Cortona

Round 1612 vertrokt ie no Rome. Je bestudeerde de klassiekn oudheid en de mêesters van d’hoge Renaissance en je liet hem inspireern deur de fresco ‘s van Domenichino en Annibale Carracci.

Deur zyn kopie van Rafaël ’s Galatea vielt ’n ip by Sacchetti, die hem in 1623 an zyn 27 joar in beschermienge pakte.

Nie vele loater kwamt ’n in contact me kardinoal Francesco Barberini, familie van de paus, die hem olsan blêef steunn.

Zyn carrière begost ols frescoschilder in de S. Bibiana. In de joarn 1625-1630 miekt ie zyn êeste architectnountwerp vo de familie Sacchetti, de Villa del Pignetto, die nu nie me bestoat.

An ’t ountwerp van ’t Palazzo Barberini werktegt ie tegoare me Bernini en Borromini, achter da Maderno gestorvn was in 1629. Je voerde ’t nu veranderde theoater uut, mo ‘t mêeste succes had ’n met ’t plafongfresco van de grôte zoale: de verheerlikienge van de familie Barberini, de familie van paus Urbanus VIII (1633-1639).

Je werkteg’ ook vo de Medici an ’t Palazzo Pitti in Firenze en je makte loater ook de fresco’s in de zoale van ’t Pallazo Pamphili.

Ip ‘t hoogtepunt van zyn succes wierd ‘n vo de joarn 1634-1638 tout de principe van de Accademia di San Luca verkoozn.

Plafongfresco van de Palazzo Barberini (1633-1639)

Ofbeeldiengn die ier by passn ku je vien in de categorie Pietro da Cortona van Wikimedia Commons.