Knopgalle

E knopgalletje (Pleurobrachia pileus) is e bêeste die dêel uutmakt van de rebbekwallen (Ctenophora). E rebbekwalle is gin nittelbêeste lik de schyfkwalle.

Knopgalle
Cyanea capillata en Pleurobrachia pileus
Taxonomische indêlienge
Ryk: Animalia (Bêestn) Stamme: Ctenophora (Rebbekwallen) Klasse: Tentaculata Orde: Cydippida Familie: Pleurobrachiidae Geslacht: Pleurobrachia
Sôorte
Pleurobrachia pileus Müller, 1776

Uutzicht

Knopgalletjes wordn 2 tout 3 cm grôot. Hêel 't joar deure spoeln z' an ip 't strange moa surtout in de lente en de zomer. Ze zien der uut lik zochte deurzichtige marbeltjes.

Knopgalletje ip 't strange van Blanknberge

Knopgalletjes hen acht verticoale rebbn woarip dat er klêne platte zwemploatjes zittn me trilhartjes die ritmisch ip en nere beweegn en woamee dan z' hunder vôortbeweegn. In lucht van e lampe of van de zunne krygn ze 't effect van e bewegende regenboge.

Vanboovn hen z' een evenwichtsorgoan en hunder mound zit vanounder.

Voedienge

Knopgalletjes eetn planktonbêestjes, visjes en zelfs hunder eign sôorte. Ze vangn ze me twi lange tentoakels die kunnen ingetrokkn wordn en die e plakkerige stoffe uutscheidn. Os 't bêestje an de tentoakel bluuft hangn, wordt 't noa de moundopenienge gebrocht.

Vôortplantienge

Knopgalletjes zyn twislachtig en ze briengen zowel zoadcellen of eitjes vôort. Eicellen wordn in 't vôorjoar in 't woater bevrucht. In 't begun zwemmn de larvn tusschn 't plankton.

Leefgebied

Knopgalletjes leevn in oundiep woater, dichte by de kust an weerskantn van de nôordelikkn Atlantischn Oceoan.

Toaln

• West-Vlams:
  • Blanknbergs: Knopgalletje
  • Heists: Roldertje (azo genoemd omda z' in de visnettn weg en were rolln tusschn de vis)
  • Ostends: Teirlinkgalletje of gallebolle
• Nederlands: Zeedruif
• Iengels: Sea gooseberry
• Frans: Groseille de mer
• Duuts: Seestachelbeere

Externe koppeliengn

• Foto's
• Iengels
• Sôortnbank

Ofbeeldiengn die ier by passn ku je vien in de categorie Pleurobrachia pileus van Wikimedia Commons.