Robrecht I van Vloandern

Robrecht I, bygenoamd de Fries (ca. 1029/1032|32 – Kassel (Vrankryk), 13 oktober 1093) was groaf van Vloandern van 1071 tout an zyn dôod.

Robrecht de Fries

ca 1030 - 1093
Groaf van Vloandern
Periode 1071 - 1093 Vôorganger Arnulf III Ipvolger Robrecht II
Groaf van Holland
Periode 1063 (regent vo Dirk V) Vôorganger Gertrude van Saksn Ipvolger Dirk V van Holland
Voader Boudewyn V van Vloandern Moeder Adela van Mêesn

Je was de twidde zeune van Boudewyn V van Vloandern en Adela van Mêesn.

Vrouwe en jounges

Je trouwde in 1063 mè Gertrude van Saksn, weeuwe van groaf Floris I van Holland. Vandoa zyn bynoame de Fries. In dien tyd was ter nog sproake van ’t Groafschap West-Friesland. De noame Groafschap Holland kwam moar in gebruuk round 1100.

Z’haan vuuf jounges:

• Robrecht II van Vloandern
• Adela van Vloandern, getrouwd mè Knud IV van Denemarkn, d’ouders van Karel de Goein
• Gertrude van Vloandern, getrouwd mè Diederik van Ipper-Lothariengn, d’ouders van Diederik van den Elzas
• Filips van Lo (zyn ounwettige zeune Willem van Yper (of Willem van Lo) was burggroave van Yper en Lo)
• Ogiva, abdis van Mêesn

Groafschap Vloandern

Zyn oudere broere Boudewyn VI, groaf van Vloanderen en Henegouwn, stierf in 1070 en je wierd ipgevolgd deur zyn oudste zeune Arnulf III, bygenoamd den Oungelukkign, azo genoemd deurdat ’n sneuvelde in de Slag by Kassel (22 februari 1071). Robrecht de Fries, zyn nounkel, was e familieoorloge begost vo ’t groafschap Vloandern, teegn de weeuwe van zyn broere, Richilde van Henegouwn, en heur twi zeuns Arnulf III en Boudewyn II.

Filips I van Vrankryk en Willem de Veroveroare, die keunienk van Iengeland gewordn was, stoundn an de kant van Arnulf III. Uuteindelik krêeg Robrecht de Fries toch de steun van de keunienk van Vrankryk, die hem erkende ols groaf van Vloandern. Zyn schônzuster Richilde en heur zeune Boudewyn II hieldn ’t groafschap Henegouwn.

In 1086 vertrok Robrecht de Fries noa ’t Hillig Land (1086–1089). Je liet ’t regentschap over Vloandern in handn van zyn zeune, de loatern Robrecht II van Jeruzalem. In 1087 gaft ’n militaire hulpe an de Byzantynschn keizer Alexius I teegn de Turkn.

Robrecht I wierd in 1093 ipgevolgd deur zyn zeune Robrecht II.