Rudolf II van et HRR

Rudolf II (Weenn, 18 juli 1552 - Praag, 20 januoari 1612) van 't Huus Habsburg, was e zeune van keizer Maximiliaan II en Maria van Spanje. Zyn moeder was e dochter van Keizer Karel V en Isabella van Portugal.

Rudolf II

1552-1612
Keizer van 't HRR
Periode 1576-1612 Rôoms-Duutsche keunienk : 1575-1612 Vôorganger Maximiliaan II Ipvolger Matthias
Eirtshertog van Ôostnryk
Periode 1576-1608 Vôorganger Maximiliaan II Ipvolger Matthias
Keunienk van Hongareye en Krowoasje
Periode 1576 - 1608 Vôorganger Maximiliaan II Ipvolger Matthias
Keunienk van Boheemn
Periode 1576 - 1611 Vôorganger Maximiliaan II Ipvolger Matthias
Voader Maximiliaan II Moeder Maria van Spanje

Je was keunienk van Hongareye en Boheemn, eirtshertog van Ôostnryk en keizer van 't Hillig Rôoms Ryk.

Zyn leevn

Rudolf II is geboorn in Weenn. Je verblêef van zyn 11 tout zyn 19 joar (1563-1571) in Spanje an ’t hof van zyn moeder heur broere Filips II van Spanje. Weregekommn in Weenn zag zyn voader nie geirn dat ie zo styf en conservatief ipgebrocht was. An ’t Ôostnryks hof woarn ze vele losser.

Rudolf blêeft de reste van zyn leevn gereserveerd en geslootn. Je reisde nie geirn en je was nie g’interesseerd in de doagelikse stoatszoakn. Je was mêer g’intrigeerd deur astrologie en alchemie en zyn andere hobby’s, lik zyn verzoameliengn van o.a zweirdn, muziekinstrumentn, horloges, kompassn, telescoopn en andere weetnschappelikke instrumentn, en van kunst.

In 1583 verplatste Rudolf ’t keizerlik hof van Weenn no Praag, dat in 1526, achter den dôod van Lodewyk II van Hongareye in handn van de Habsburgers gekommn was. Praag kwam et center van Centroal-Europa en trokt doadeure vele buutnlanders an, surtout Duutschers en joodn.

Rudolf zocht no ’t êeuwig leevn en zyn lyfdokteur was Anselmus de Boodt van Brugge. Rudolf probeerdeg ook goud te moakn en de noame van ’t Goudn stratje (Zlatá Ulička) in de binnenstad van Praag zou nor hem vernoemd zyn.

Olhoewel dat ie katholiek ipgebrocht was an ’t hof van zyn nounkel in Spanje was Rudolf verdroagzoam vo ‘t Protestantisme en andere godsdienstn.

Rudolf is nôoit getrouwd gewist en sommigte beweirn dat ie homo zou gewist zyn. Mo je zou wel jounges g’hed hen mè maîtresses, w.o de dochter van Ottavio de Strada, die van Vlamsche ofkomste was. Ottavio was antiquair en j’adviseerde Rudolf over kunstankoopn.

Rudolf II de mecenas

Rudolf II wordt anzien als êen van de belangrykste mecenassn uut de geschiedenisse en je gaf grôte sommn geld uut an kunst. Je kocht werkn van Dürer en Brueghel en je liet eigntydse schilders, beeldhouwers, edelsmeedn en weetnschappers an zyn hof in Praag kommn, w.o. ook kunstenoars uut de Nederlandn, lik Karel Van Mander, Adriaen de Vries en Paulus van Vianen.

’t Ountwikkeldeg hem e nieuwe styl en der wierd geklapt van Praags maniërisme, gekenmerkt deur mythologische ounderwerpn en naktn in gecomplikeerde poses.

Rudolf II als Vertumnus, deur Giuseppe Arcimboldo (Kastêel Skokloster, Zweedn)

Zyn krône kwam loater de keizerlikke krône van ‘t Keizerryk Ôostnryk

Ofbeeldiengn die ier by passn ku je vien in de categorie Rudolf II van Wikimedia Commons.