Richterschoale

De Richterschoale is een maniere woarup da de seismischn energie van een eirdbevienge gemeetn wordt. De schoale is upgesteld deur den Amerikoansn seismoloog Charles Francis Richter, en is een logaritmische schoale met as groundgetal 10. Da betêkent dat een eirdbevienge die 5,0 meet up de Richterschoale tien kêren sterker is dan êen die 4,0 gemeetn wordt. Den effectieve grenze voa de Richterschoale is 6,8. 't Is doavan dat de Richterschoale officiêel vervangn is deur de MMS of momentmagnitudeschoale, die vô middelmoatige eirdbeviengn min of mêer 't zelste resultoat gift gelik de Richterschoale, moa gin boovngrenze hèt, en doadeure mêer accuroate leziengn gift voa zwoare eirdbeviengn.

Richtermagnitudes

De Richtermagnitude van een eirdbevienge wor gemeetn as de logaritme van d' amplitude van de golvn gemeetn deur een seismogroaf. D' ôorsprounkelike formule is:

${\displaystyle M_{\mathrm {L} }=\log _{10}A-\log _{10}A_{\mathrm {0} }(delta),\ }$

woarda A de maximum uutwykienge is up een Wood-Anderson seismogroaf, en A₀ een empirische funksje is die ofhangt van den ofstand delta tusschn 't epicenter en 't meetstasjong. Over 't olgemêen wordt het gemiddelde van de resultoatn van verschillende meetstasjongs berekend.

D' ounderstoande tabelle beschryft de typische gevolgn van een eirdbevienge van verschillende sterktn. D' interpretoasje is nie zo dudelik, angezien dat de gevolgn ook ofhangn van den ofstand van 't epicenter, de diepte van d' eirdbevienge en de platselike geologie.

Richtermagnitude	Beschryvienge	Gevolgn	Frequensje
Minder dan 2,0	Micro	Micro-eirdbevienge, wor nie gevoeld	Omtrent 8.000 per dag
2,0-2,9	Klêne	Over 't olgemêen nie gevoeld, moa wel gemeetn	Omtrent 1.000 per dag
3,0-3,9		Dikwils gevoeld, moa zeldn mè schoa	Omtrent 49.000 per joar
4,0-4,9	Lichte	Voelboar schuddn van diengn in 't huus; zounder betêkenisvulle schoa	omtrent 6.200 per joar
5,0-5,9	Moatig	Kan schoa verôorzaakn an slicht gebouwde huuzn; goe gebouwde huuzn hên moa winnig schoa	omtrent 800 per joar
6,0-6,9	Sterk	Kan in een zone van 160 kilometer schoa verôorzaakn	omtrent 120 per joar
7,0-7,9	Zwoar	Kan serieuze schoa andoen in een grôot gebied	omtrent 18 per joar
8,0-8,9	Vrê zwoar	Kan serieuze schoa andoen in een vrê grôot gebied	omtrent 1 per joar
9,0-9,9		Verwoestienge in gebiedn met een diameter van mêer dan 1.500 kilometer	1 per 20 joar
10,0+	Katastrofoal	Nôois gemeetn	Vrê zeldzoam

Externe koppelienge

• Aardbevingen in Europa en de wereld