Relîs Namurwès

Les Relîs Namurwès, c' est ene soce di scrijheus e walon do Payis d' Nameur.

li rowe des Relîs Namurwès a Bomel

Istwere del soce

plake po s' sovni des Relîs Namurwès, a l' Atenêye di Nameur

imådje dessinêye pa les Relîs prijhnîs e l' guere di 14

Li soce a skepyî e 1909 di cwate soçons, 17 à 20 ans vîs, di l' Atenêye di Nameur : Télesphore Lambinon, Auguste Demil, Georges Pelouse et Lucien Maréchal.

E 1910, il enondnut ene gazete, «li Ban-cloke», po-z eplaidî leus tecses, sicrîts e Feller timprou.

E 1914, end a sacwants ki sont prijhnîs e l' Almagne et mete so pî les «Kriegscayès», des scrijhaedjes k' i fwaiynut ladrî, et ls evoyî a Émile Robin, dimoré e payis.

E 1928, i gn a 21 mimbes amon les Relîs Namurwès, il ont scrît aviè 600 ouves et 54 d' cesses-lale ont stî relîtes pal SLLW.^[1]

Dispu 1937, les Relîs Namurwès eplaidnut les Cayés Walons.

Gn a ene peclêye di grands scrijheus ki fourît (u ki sont co) des Relîs Namurwès, come Edmond Wartique, Jean Guillaume, Auguste Laloux, Émile Gilliard, Georges Smal, Victor George, Joseph Selvais, Guy Brenner, Chantal Denis.

A dater d' aviè 1997, les Relîs ont eto adjinçné des scoles di walon (4 anêyes, et on pout rdobler l' cwatrinme come on vout).

Tos ls ans, les Relîs dinèt l' cocåde a onk (ene) di leus mimbes k' a stî meritant(e).

Politike del soce

Li soce a come essegne ene passete det come sipot "Waire mins bon". Eto, elle a todi cweri a eplaidî les meyeus scrijhaedjes e walon. Ele n' esteut nén racrapotêye sol payis d' Nameur. Elle a yeu eto des mimbes do costés d' Tchålerwè (Henry Petrez, Gabrielle Bernard, Willy Bal, Josée Mathot). Elle a-st eplaidî des rlomés scrijheus lidjwès (Louis Remacle, Albert Maquet). Ey eto des scrijheus del Bote di Djivet come Michel Dricot.

Les Relîs namurwès ont todi stî ene miete wårdiveus. Diviè 1960, les pus vîs Relîs namurwès n' volît nén accepter li powezeye imådjrece di des scrijheus come Jean Guillaume, Georges Smal eyet Émile Gilliard. Po zels, i faleut ki les tecses soeyénxhe reyalisses, et tolmonde elzès poleur comprinde d' on lan.

A pårti di 1995, il ont stî disconte li mouvmint di rfondaedje do walon, mågré ki sacwants des rfondeus (Lorint Hendschel, Lucyin Mahin) estént camaerådes avou leu soce, et scrijheus ezès Cayés Walons.

Lomaedje del soce

Les cwate djonneas mimbes askepieus avént dit a leu prof di flamind ki ci sereut clapant d' aprinde eto l' walon.

Estoumaké, li prof responda : "Bén, vos nd estoz, des relîs !"

Li no del soce aveut vnou sins må sins rujhes.

Sacwants prezidints

• Charles Camberlin
• Joseph Calozet
• Lucyin Léonard
• Lucyin Somme
• Joseph Dewez

Sacwants penleus

• Paul Maréchal
• Hubert Jacques
• Paul Rousselle
• Guy Delvaux
• Christine Decock
• Jean Colot