万里街道

萬里街道，是中國上海市普陀區下頭一隻街道辦事處，本來是長征鎮個一部分，2014年11月24號從長征鎮裏向拆出來個^[1]，街道轄區面積3.3平方公里^[2]，街道辦事處勒垃真金路459號^[3]。

歷史

萬里地區老底子是嘉定縣個，清朝個辰光因為成立寶山縣，劃畀寶山縣真如鄉。^[4]民國17年（1928年）7月7號，萬里地區幫真如鄉一道劃畀上海特別市^[5]，真如鄉改建成真如區。民國28年（1939年），真如區撤銷，萬里地區劃畀滬北區。民國34年（1945年），恢復真如區，萬里地區再劃畀真如區。^[6]1956年3月份，撤銷真如區，萬里地區進仔西郊區。^[7]1958年，西郊區撤銷，^[6]萬里地區劃畀嘉定縣，是長征人民公社管個。1983年6月份，政社分設，萬里地區分屬長征鄉個萬里、長征、橫港三隻村。^[8]1984年11月份，長征鄉萬里地區個長征村從嘉定縣劃畀普陀區。^[9]1992年7月15號，長征鄉萬里地區個萬里、橫港兩村從嘉定縣劃畀普陀區，儕屬於普陀區長征鄉。1993年12月20號，長征鄉撤鄉建鎮，萬里地區屬長征鎮。^[10]

2014年11月24號，上海市人民政府批覆同意萬里地區從長征鎮析出，設立萬里街道，行政區域範圍是：東到嵐皋路，南到交通路，西到桃浦西路、真南路，北面是寶山區大場鎮，街道辦事處一開始勒垃富平路518號^[1]。2015年1月6號，普陀區舉行萬里街道揭牌成立大會^[11][12]。2015年3月20號，萬里街道辦事處正式掛牌成立^[2]。2015年10月23號，上海市人民政府批覆同意萬里街道辦事處駐地搬到乃朝箇隻真金路459號^[3]。

行政區劃

萬里街道下頭個居民委員會：交暨居委會、香泉路居委會、萬里名軒居委會、中浩雲居委會、愉景華庭居委會、中駿天譽居委會、頤華第一居委會、頤華第二居委會、萬里雅築居委會、富平居委會、凱旋華庭居委會、凱旋公寓居委會、中環家園居委會、中環錦園居委會、中環花苑居委會。^[13]