三极管

三極管（英語：triode）是一種有放大器功能個真空管。渠包括三隻電極，就是加熱燈絲（陰極）、控制柵格搭金屬平板（陽極），渠拉儕畀囥拉一隻真空個玻璃殼裏向。拉1906年，李·德富雷斯特發明仔初代個三極管Audion管。

左手邊是1918年個低功率三極管，右手邊是1960年代個微型管

三極管是第一種拉實踐當中用個電子放大器，也是另外幾種真空管個祖宗，比方講四極管搭五極管。三極管個發明，使得無線電技術搭長途電話變得有可能哉。一直到1970年代前頭，三極管畀人經常性應用拉消費電子產品當中，比方講收音機搭電視機，後些來畀電晶體代替為界。今朝，三極管主要還用拉無線電發送器當中個高功率射頻放大器搭工業里向個射頻高溫加熱設備當中。

Audion管是一種部分真空管，渠馱一隻柵極加到熱離子兩極管高頭。三極管就是拉Audion管個基礎高頭發展來個。

歷史

先驅產品

主文章：極離子管

1906年，德·富雷斯特發明個第一隻三極管。阿拉可以看到平板拉高頭，之字形個線柵拉下底。 燈絲原來拉下線柵個下底，但是已經燒壞脫哉。

李本-萊茲管，是拉搭Audion管相同個辰光，由羅伯特·馮·李本發展起來個另外一種原始三極管。

拉熱離子真空管發明前頭， 菲力普·萊納德拉1902年做光電實驗個辰光，用到仔柵格控制原理。用拉無線電當中個頭一隻真空管是熱離子兩極管（或弗萊明真空管）。渠是約翰·弗萊明拉1904年做無線電接收器探測員個辰光發明個。渠是一隻玻璃燈炮，包括一隻加熱燈絲（陰極）搭一隻板（陽極）。

發明

1906年，美國工程師李·德富雷斯特搭奧地利物理學家羅伯特·馮·李本為仔控制電流，儕選擇拉燈絲搭平板之間加進一隻控制柵格，並分別獨立申請專利。

馮·李本發展個部分真空三元件管拉1906年3月申請專利。箇種管里向有少量汞蒸氣，為仔放大微小個電話信號。從1906年10月開始，德富雷斯特為交關三元件管個設計方案申請專利。渠通過拉兩極管里向加進一隻電極，發明仔Audion管，作為無線電探測器。拉其中一隻方案當中，柵格畀擺拉燈絲搭平板個當中央。箇隻方案後些來成為三極管個設計方案，並拉1907年1月29號申請專利。類似於馮·李本個真空管，德富雷斯特個真空管並弗完全真空，里向還有眼低壓氣體。馮·李本拉渠發明箇種真空管七年後頭就死脫哉，所以渠個發明嘸啥人關注搭仔改進。

剛剛開始個辰光，李·德富雷斯特個Audion管個放大功能嘸沒多少人用，到大概1912年個辰光才畀幾個研究人員發現。渠拉利用Audion管成功造出放大個無線電接收器搭電子振盪器。Audion管拉放大方面交關多個用場刺激仔渠老快個發展。 拉1913年之前，AT&T個哈羅德·阿諾德對渠進行改進，使得渠個真空性增強，並從德富雷斯特手裏買落版權。另外，通用電氣個歐文·朗繆爾則渠個管子取名字叫「Pliotron」。箇幾隻就是頂頂早個真空三極管。

廣泛使用

1912年，三極管個放大功能畀人發現，箇是電子技術革命性個發展，開創仔電子學箇個新領域。三極管當即用拉交交關通信領域當中。三極管個「連續波」無線電發送器替代仔低效個「減衰波」火花發送器，好發送調幅個聲音信號。放大三極管個無線電接收器，好驅動揚聲器。渠替代仔只好用耳機聽個礦石收音機，全家老小好一道聽。箇讓收音機從商用個信息服務，演化成頂早個大眾傳播媒體。拉大概1920年個辰光，電台廣播出現哉。三極管也讓跨大陸個電話服務成為可能。AT&T拉買落Audion管個版權後頭髮明仔真空三極管中繼器，讓通話個距離好超過800英里個放大限制。三極管帶來個別個發明也使得電視、公共放送系統，電子留聲機搭有聲電影成為可能。