加拿大

加拿大（英文：Canada）是北美洲北部國家，面積邪氣大，是世界上第二大個國家，人口只有三千五百萬（2013.9），比吳語使用者還要少交關。老早茲有蠻多個原住民部落，譬如克裏人（Cree),因紐忒人（inuit)。公元1000年左右，北歐海盜（有些人謳渠拉「維京人」）到過紐芬蘭島，但是渠拉搭原住民發生衝突，沒留下來。十六世紀初，交關歐洲國家亦開始派人到加拿大考察，譬如法國個介底埃（Jacques Cartier），17世紀，英國搭法國開始爭奪殖民地，打仗打茲好兩場，最後勒七年戰爭（1756~1763）之後，法國人拿渠全部個北美殖民地（新法蘭西）儕割讓畀英國搭西班牙。直到公元1867年加拿大東面個四個省（Ontario,Québec,New Brunswick,Nova Scotia）聯合成立自治領，加拿大一直是英國殖民地。該之後一百年裏向，加拿大參加了兩場世界大戰，獨立性增強。從上個世紀六十年代開始，講法語個蓋辦克（Québec）希望從加拿大獨立出去，勒1980年搭1995年舉行茲兩𡍲全民公投，尤其是後頭一𡍲，支持率達到49.4%，但是仍舊沒獨立成功。乃晌個加拿大，市場經濟交關發達，與美國個經貿關係邪氣密切，政治浪來講，渠是議會制聯邦，分上下兩院，以英國君主作爲國家元首，以總理爲政府首腦。加拿大是雙語國家，加拿大小囡勒學堂裏要學另外一種官方語言，而法語勒蓋辦克之外也有一定個地位。漢語族語言個使用者勒拉加拿大超過100萬，該浪向粵語個影響力頂大。加拿大個人類發展指數（HDI）達0.911，搭上海差弗多。

加拿大國旗

行政

省份

• 安大略省（英語、法語：Ontario）
• 不列顛哥倫比亞省（英語： British Columbia，法語：Colombie-Britannique）
• 魁北克省（法語：Québec，英語：Quebec）
• 新斯科舍省（英語：Nova Scotia，法語：Nouvelle-Écosse）
• 愛德華王子島省（英語：Prince Edward Island，法語：Île-du-Prince-Édouard）
• 紐芬蘭與拉布拉多省（英語：Newfoundland and Labrador，法語：Terre-Neuve-et-Labrador）
• 新不倫瑞克省（英語：New Brunswick，法語：Nouveau-Brunswick）
• 馬尼托巴省（英語、法語：Manitoba）
• 艾伯塔省（英語、法語：Alberta）
• 薩斯喀徹溫省（英語、法語： Saskatchewan）

地區

• 努納武特地區（英語、法語：Nunavut）
• 西北地區 （英語：Northwest Territories）
• 育空地區 （英語、法語：Yukon）

外部鏈接

• 加拿大政府檔案，存勒互聯網檔案館當中。（2020年5月5號） （英語）（法文）
• 加拿大旅遊局檔案，存勒互聯網檔案館當中。（2020年5月9號） （英語）（法文）（西班牙文）

（德文）（日文）(朝鮮文)（簡體中文）