加拿大

加拿大（英文：Canada）是北美洲北部国家，面积邪气大，是世界上第二大个国家，人口只有三千五百万（2013.9），比吴语使用者还要少交关。老早兹有蛮多个原住民部落，譬如克里人（Cree),因纽忒人（inuit)。公元1000年左右，北欧海盗（有些人讴渠拉“维京人”）到过纽芬兰岛，但是渠拉搭原住民发生冲突，没留下来。十六世纪初，交关欧洲国家亦开始派人到加拿大考察，譬如法国个介底埃（Jacques Cartier），17世纪，英国搭法国开始争夺殖民地，打仗打兹好两场，最后勒七年战争（1756~1763）之后，法国人拿渠全部个北美殖民地（新法兰西）侪割让畀英国搭西班牙。直到公元1867年加拿大东面个四个省（Ontario,Québec,New Brunswick,Nova Scotia）联合成立自治领，加拿大一直是英国殖民地。该之后一百年里向，加拿大参加了两场世界大战，独立性增强。从上个世纪六十年代开始，讲法语个盖办克（Québec）希望从加拿大独立出去，勒1980年搭1995年举行兹两𡍲全民公投，尤其是后头一𡍲，支持率达到49.4%，但是仍旧没独立成功。乃晌个加拿大，市场经济交关发达，与美国个经贸关系邪气密切，政治浪来讲，渠是议会制联邦，分上下两院，以英国君主作为国家元首，以总理为政府首脑。加拿大是双语国家，加拿大小囡勒学堂里要学另外一种官方语言，而法语勒盖办克之外也有一定个地位。汉语族语言个使用者勒拉加拿大超过100万，该浪向粤语个影响力顶大。加拿大个人类发展指数（HDI）达0.911，搭上海差弗多。

加拿大

行政

省份

地区

外部链接

Wikiwand - on