南斯拉夫

南斯拉夫（塞爾維亞-克羅地亞語西里爾字母：Југославија，拉丁字母：Jugoslavija），是1918年到2003年建立拉南歐巴爾幹半島上個聯邦制國家。以從奧斯曼土耳其帝國獨立個塞爾維亞族所建立個塞爾維亞王國為基礎，經兩次巴爾幹戰爭搭第一次世界大戰，隨着奧斯曼土耳其帝國、奧匈帝國個戰敗，塞爾維亞搭附近個各南斯拉夫人地區合併，創建南斯拉夫王國。1941年，軸心國入侵、佔領、分裂南斯拉夫。第二次世界大戰結束以後，南斯拉夫王國改成功聯邦制個社會主義國家，叫南斯拉夫聯邦人民共和國，1963年改成功南斯拉夫社會主義聯邦共和國。1963年、1971年搭1974年個新憲法弗斷分權，提升各共和國權力，箇咾各個共和國個離心力增加。

1991年到1992年，除脫塞爾維亞同黑山，其他民族國家紛紛從南斯拉夫獨立，聯邦政體箇咾解體哉。塞爾維亞同黑山兩個國家勒拉1992年重新組織成立南斯拉夫聯盟共和國，希望繼承原先個聯邦。但是新邊界個劃分問題引發前南各國打仔十年個南斯拉夫內戰。

2003年，南斯拉夫聯盟共和國重組成更加鬆散個邦聯，改名字叫塞爾維亞搭黑山，南斯拉夫箇個詞變成只歷史名詞。

到2008年，前南斯拉夫攏總分裂出北馬其頓、塞爾維亞、波斯尼亞和黑塞哥維那、克羅地亞、斯洛文尼亞、黑山箇六個受聯合國承認個國家，還有隻有一星國家承認個科索沃。