哈佛大学

哈佛大學（英語：Harvard University）是一座勒垃北美東北面美國新英格蘭地帶城市波士頓郊外個私立研究型大學，也是世界浪頂頂有名個大學搭常春藤聯盟個核心學堂。渠勒垃世界各大排行榜里向名列前茅。

哈佛大學
Harvard University
校訓	Veritas（真理）
創建時間	1636年
校長	Alan Garber
教師	2100個人
網站	Harvard.edu

哈佛大學是1636年當地殖民地立法機關立案成立個，到難是全美國歷史頂頂悠久個高等學府，還有北美洲頂頂老個校董會。渠開始辰光叫「新學院」（New College），後首來為仔感謝一個叫約翰·哈佛個年輕加爾文宗牧師捐鈔票，就改名「哈佛學院」。雖則渠從來朆正式搭啥個宗教派別有聯繫，必過老早個學院主要是培養公理會搭一位論派個神職人員個。但是從18世紀開始，課程搭學生子群體個宗教色彩就慢慢較淡脫哉，到仔19世紀，哈佛就變成功波士頓精英文化個發源地哉。美國南北戰爭後來，伊歇個校長查爾斯·艾略特拿哈佛各個學術機構合併成一所研究型大學，還加仔小班上課搭仔入學考試，箇眼模式也影響到全美國個中高等教育政策。箇所學堂也是美洲大學協會12個創始成員之一。後首來經歷經濟大蕭條搭第二次世界大戰，渠拉又進一步調整課程咾招生政策，末腳搭拉德克利夫學院合併變成男女學生子同一個學堂。

箇歇哈佛大學攏共有十所學院咾一所高等研究院，箇些單位分布垃附近個各個區：主校區垃劍橋個哈佛園；醫學、公共衛生搭仔牙醫學院勒垃波士頓個長木醫學區；還有包括哈佛體育場個大學體育設施搭仔商學院勒垃奧爾斯頓。哈佛還擁有蠻大個資產，每年收着個捐款數目一徑排垃全球教育機構里向頭一名。

約翰·哈佛個雕塑

哈佛大學是全美國頂頂難進個大學之一。學堂個研究生課程比較多樣化，本科教育呢主要集中垃文理學。2007年開始，學堂實行財政援助政策，屋裏向年收入比一定數目少個學生子好拿着弗同程度個學費減免。哈佛有全美國頂古老個圖書館系統，也是全球頂大個私立搭大學圖書館系統，收藏超過1,600萬本書。渠是常春藤盟校成員之一，難攏共有42支參加弗同體育比賽個校隊，屬於全美大學體育協會甲組。除脫體育，學生個課外生活還包括各個學會組織個活動。哈佛校友包括8個美國總統搭仔交關國家領袖搭政治人物；渠還培養出62個億萬富翁企業家咾335位羅德學者，人數全是全美國頂多個。到2020年10月份為止，攏共有161個諾貝爾獎得主、18個菲爾茲獎得主搭14個圖靈獎得主垃哈佛學習或者工作過。

歷史

廿一世紀

2025年4月11號，美國總統特朗普要求哈佛大學取消脫反猶政策搭偏向少數族裔個措施。14號，哈佛大學拿特朗普政府個要求回頭脫。特朗普政府立時三刻宣布凍結脫畀拉哈佛個22億美元經費。^[1]5月13號，美國政府又砍脫4.5億美元個撥款。^[2]5月22號，美國政府禁止哈佛招收國際學生，^[3]第二日，美國聯邦法院一個法官對箇條禁令發出臨時限制令，要求垃29號個聽證會以前保持原狀。^[4][5]