圣约翰堂

1868年，美國監理會個戴樂醫生到仔蘇州，恩倷是頭一個來蘇州傳教個宣教士。1881年美國監理會宣教士潘慎文博士勒海天賜莊（意思是上帝賜撥個地方）買著一塊土地，造仔一座耶穌堂，名字叫「首堂」。該是聖約翰教堂個前身。1915年，監理會拆脫仔首堂，新造仔一座建築面積1855平方米，里向有800多隻座位，外加蠻有氣派個耶穌堂，該個就是聖約翰堂。

聖約翰堂是美國人約翰.M.慕爾博士用心設計個。搭天賜莊聖約翰堂建築風格一樣，面積大小一樣個現在還有兩座，一座是勒海美國個聖・路易斯，一座勒海日本個神戶。蘇州天賜莊聖約翰堂原來個名字是「蘇州東監理會教堂」，之所以改名字叫聖約翰堂，是為仔紀念衛理公會個創始人約翰・衛斯理。

聖約翰堂個建築風格全是西式個。耶穌堂個建築是根據宗教儀式發展出來個格別個樣子，是縱橫比例相差較關大個長方形平面，西面個狹端是正面，用兩排或者四排亭柱橫里向分開室內空間，中間部分咦是狹咦是高，用勒海醞釀一種宗教神聖個氣氛。現在個聖約翰堂里向有《李仲覃牧師紀念碑》，上頭寫仔茲恩倷個生平。改革開放過後，李政道博士曾經兩趟到聖約翰堂。別個李氏家族個人也來仔蠻多次個。

1959年聖約翰堂撥蘇州市第一人民醫院租搭哉。1995年撥教會收轉去，按照原來個樣子修好，變成市里向基督教兩會個辦公室搭仔江蘇省基督教蘇南義工培訓中心。2003年4月份，經過政府有關部門登記，恢復宗成教活動個場化。