宇喜多秀家

宇喜多秀家（日文：宇喜多　秀家／うきた　ひでいえ ^{Ukita Hideie}，1572年－1655年12月17號）是16世紀日本個有名封建主，五大老之一，關原合戰失敗之後，流放到海外孤島度過人生。

生平

伊本身是備前國個大名宇喜多直家拉兒子，但小辰光就畀伊拉爺送到織田信長手底下當人質。伊9歲個辰光，爺故脫。朝後，根據織田信長個安排，伊重返宇喜多家繼承家督，並成為仔羽柴秀吉個養子，得到信任搭培養，先後參加過九州征伐搭仔小田原征伐。

1590年代，元服個秀家，聽仔豐臣秀吉個命令，到朝鮮半島，搭明帝國個軍隊相戰，並擔任在拉朝鮮日本軍隊個總大將。在拉碧蹄館之戰當中，伊擔任後陣本隊總大將，搭先鋒隊總大將小早川隆景聯手設伏，讓李如松個軍隊陷入埋伏當中，末腳明軍只好跑脫。迭個功績也讓伊晉升從三位中納言。之後，1597年個慶長之役伊也參仔戰，率^{seh，音近失}左軍攻略南原城，在拉全羅道、忠清道地區奮戰。後手來，伊修造順天倭城。翌年慶長3年（1598年），成為五大老之一，迭歇伊只有廿六歲，是五大老當中頂後生個。

弗過也是因為忒嫌後生，伊壓弗牢自家個家臣：豐臣秀吉故脫之後，伊拉家臣開始騷動。儘管後手來還是平息下來哉，但也因此喪失脫仔交關軍隊搭重臣。儘管個能，在拉之後石田三成組織對抗老烏龜德川家康個戰爭當中，伊還是頂積極、派出頂多軍隊個。在拉關原合戰當日，宇喜多秀家個軍隊，占據西軍實際參戰軍隊個三分之一左右；但因為小早川秀秋叛變，西軍着末還是敗脫，宇喜多秀家跑到旁邊山里向，本生準定要畀老烏龜殺脫，後手來因為別人求情，乃麼改成功流放到海外孤島。個能，伊就再也弗曾回到過日本本土，半個世紀橫里之後，在拉小笠原群島故脫。