宗谷岬

宗谷岬（日文：宗谷岬／そうやみさき ^Sōyamisaki）是勒拉日本北海道稚內市個海岬，因為伊箇面有「日本最北端之地」箇塊石碑而出名。

「日本最北端之地」石碑

地名個由來

箇個地方勒拉阿伊努語里向叫「ノテトゥ」（notetu），意思就是海岬^[1]。

「宗谷」箇個名字倒是從阿伊努語里個「so-ya」（意思是岩石海岸）變化過來個^[2]。

地理

宗谷岬地區有弗少叫「最北」個店

宗谷岬北邊是連接日本海搭仔鄂霍次克海個宗谷海峽，同目前畀俄羅斯薩哈林州管個庫頁島就隔拉只宗谷海峽，距離最短個地方只有43公里。

「日本最北端之地」

宗谷岬地區頂頂有名個地標，是造拉海岬頂北面一小塊填海陸地浪個「日本最北端之地」紀念碑（日本最北端の地の碑）。紀念碑是一個造拉圓形平台上、總高4.53米個三角形建築物。天好個辰光好從紀念碑迭頭看到薩哈林州個陸地。

伊是目前日本頂北面個陸地，故咾周圍還有一系列拿日本頂北面當主題個項設施，比方講日本頂北面個商店（柏屋）、頂北面個餐廳（食堂「最北端」）、頂北面個民宿（最北之宿）、頂北面個郵筒、頂北面個公共廁所，還有會勒拉加油以後送張「日本頂北面加油證明」個頂北面個加油站（出光石油大岬集落分站）。

交通

唯一去宗谷岬個大眾運輸工具是從稚內站個公交總站出發，乘宗谷巴士（日語：宗谷バス）個公交車，要乘將近31公里。老底子只好乘每天5對個10號線，經南稚內站、潮見、聲問、曲渕、再到宗谷岬。2012年7月1號，伊同長途巴士「天北線」合併成新個長途巴士「天北宗谷岬線」，班次增加到7對，亦改走快速公路，路浪花脫個辰光縮短仔弗少^[3]。