年糕

年糕，東亞個一種傳統美食搭仔過年吃個物事。年糕同「年高」諧音，有年年高升個意思。年糕早期是來勒年夜裡祭祀神靈、供奉祖先用個，後些來慢慢交轉變成一種新春食品。

薺菜炒年糕

傳說

江南一帶流傳一則同年糕有關個傳說。春秋時代，吳國大夫伍子胥畀吳王夫差賜劍自刎而死。傳說伍子胥死前囑咐親信講民眾來勒國家有難貤嘸沒喫個個辰光，到象門城牆掘地三尺，就可以得到食糧。越王勾踐聽到伍子胥畀吳王夫差賜死個消息，連忙跑來攻打吳國，節節勝利。吳國個都城畀越兵圍牢，城裡向彈盡糧絕，軍民紛紛餓死。伍子胥個親信按照伊生前個講法，來勒象門掘地三尺，挖到伍子胥用江米粉蒸製以後壓製成個「城磚」。從此以後，每年過年，當地家家戶戶儕要蒸賽過城磚個江米年糕來奉祀伍子胥。因為是過年辰光做個，箇末叫伊年糕。

種類

年糕通常性是用糯米磨成粉做個。

中國年糕

北方

中國北方個年糕好蒸好炸，主要是甜個。北京年糕有江米或黃米做個紅棗年糕、百果年糕、白年糕；山西習慣用黃米粉（晉語叫伊糕面）做年糕，擺勒油里向炸，餡頭好用豆沙或者棗泥；河北習慣往年糕里向擺小棗、小紅豆、綠豆咾啥個；山東年糕用紅棗搭仔黃米蒸；東北年糕主要用粘高粱米加上豆類蒸製而成。

江南

江南個年糕白顏色各，嘸啥味道個，是粳米同糯米混合出來個，粳米擺唻多一點麼就軟一點，糯米多一點麼就硬一點，好蒸、炸、切片炒或者燉湯喫。江南部份農村用腳踏個方法做年糕，叫「腳踏糕」。^[1]