慈禧太后

出生搭入宮

1835年，慈禧在拉清帝國首都北京個劈柴胡同出生，伊個家族出自滿洲葉赫氏，屬滿洲鑲藍旗，雖然弗好講是大富大貴，但終歸世代為官，伊從小吃穿儕弗用操心，是典型個滿洲貴族鐵杆莊稼生活。

1852年，伊18歲辰光，參加北京旗人家庭必須參加個選秀女活動，畀皇室挑中，從此進入紫禁城，號「蘭貴人」，居儲秀宮麗景軒。

獨寵後宮

咸豐四年（1854年）畀封為懿嬪（迭個詞彙個滿文含義是文雅），也是從迭個辰光開始，伊得到咸豐帝個寵愛，咸豐六年三月（1856年），伊生下咸豐帝獨子載淳（即同治帝），晉封「懿妃」，次年，封貴妃，成為咸豐帝后宮當中排名第二個人物，又因為咸豐只有單獨一個兒子，更加確保伊之後個地位。

熱河上位

1860年，因為判斷失誤，英國同法國發動第二趟鴉片戰爭，清廷大沽口失守、又在拉八里橋戰役當中輸脫之後，為避免畀英法聯軍捉牢，只好急急忙忙跑路熱河避暑山莊。慈禧也跟牢咸豐來到熱河。1年過後，咸豐十一年七月十七號（1861年8月22日），咸豐帝因為天天搞女人，吃老酒，身體越來越推板，最終在拉承德避暑山莊煙波致爽殿內駕崩。伊個皇后畀尊為慈安太后，載淳即位，成為同治帝。慈禧因為是載淳個姆媽，也就自動成為皇太后，又因為慈安太后住避暑山莊煙波致爽殿東暖閣，所以又叫東太后，慈禧太后住煙波致爽殿西暖閣，所以叫西太后。

政變掌權

咸豐死脫個辰光，設計出一套保障自家兒子個制度，即：讓肅順為代表個八個咸豐信任個皇室遠親或者做題家，掌握朝廷個政治權，讓自家個兩個老婆（慈安同慈禧），掌握決定權。弗過，迭個制度一來弗曾考慮到自家阿弟奕訢，二來對八大臣同兩宮太后個矛盾估計弗足，老快就因為慈禧個干涉解體。1861年十月，慈禧、慈安同恭親王奕到，通過發動辛酉政變，拿肅順為代表個八個顧命大臣做脫，讓自家成為清帝國個實際統治者。

垂簾聽政

政變之後個慈禧，同慈安一道，藉口同治帝年齡太小，就在拉紫禁城個養心殿設置門帘，讓自家坐到皇帝身後個門帘當中聽政，判斷、處理事體。因為慈安本身是比較傳統個滿洲女人，弗大清爽漢文，而慈禧剛好反過來，漢字儕看得懂，滿文倒是水平比較推板，導致慈禧參加政治活動個頻率同聽到個消息儕佔據壓倒性多數。個能，伊就徹底成為清帝國實際個控制人哉。

在拉同治辰光，慈禧對外做個主要事體，是明面高頭賞賜曾國藩為代表個南方漢人地主一眼自我管理個實際權力，換取伊拉對中央個服從同表面恭敬。背地裏，則通過楊乃武和小白菜之類個案件，拿湖南人、安徽人個實力釜底抽薪。對於同外國人打交道，慈禧因為咸豐出逃個記憶，表現個稍許靈活一眼，同意恭親王個想法，開設總理各國事務衙門，作為對外國人打交道個場所。弗過，對于洋人提出個交關要求（比方講直接搭同治皇帝見面，自由貿易之類），伊嘸多少興趣了解，更歡喜隨便應付，或者讓李鴻章之類自家信任個洋務運動帶頭人去處理。

慈禧真正關心個，還是自家權利是弗是有徹底穩固。1870年代，同治帝年齡大起來之後，逐漸弗聽伊個言語，讓伊邪氣操心。1874年，同治還因為感染天花死脫，之後，慈禧為穩固自家地位，立咸豐帝之弟奕譞之子載湉入嗣大宗，繼承大清皇位，改年號「光緒」，兩宮太后再次聽政。

獨攬朝堂

1870年代末，因為朝廷當中清流崛起，左宗棠回到北京，以及恭親王長期掌握朝局，同慈安關係搭僵等關係，慈禧身體弗大靈光，經常生毛病，弗過，到1880年代頭幾年，幾個問題一一消失。首先是1881年，慈安太后突然死脫。3年之後，清流同恭親王因為法清戰爭個舉措失誤，讓慈禧捉牢把柄，拿伊拉儕罷免調人，之後幾年，慈禧享受難得太平年歲，伊信任個人變成功榮祿搭奕劻。心思花在幫光緒挑選老婆以及修造頤和園高頭，1890年，伊拿處理政治個權力「歸還」光緒，移居頤和園，開始退休生活。

弗過，1894年，慈禧因為要辦六十歲生日，用脫交關本身要做國防建設個鈔票，結果，在拉日清戰爭當中，洋務運動訓練出來個北洋水師，以及之前平定太平天國之亂、捻匪、回亂個湘軍、淮軍儕一敗塗地。個能，弗單單宣告洋務運動破產，也讓光緒同慈禧個矛盾慢慢較因為到底是弗是要對帝國進行改革激烈起來。一幫主張要激烈改革，想憑藉個能往高頭走個讀書人開始向光緒靠攏，形成所謂個「帝黨」，而本身抗拒改革個道學家、滿洲貴族，向慈禧靠攏，形成後黨。

戊戌到庚子

1898年，光緒帝聽從康有為等人個意見，開始進行大規模，激進個改革活動（戊戌變法），慈禧太后一開始對迭個舉動表達過個人反對，弗過也弗強行阻止。弗過，光緒周邊個文人儕認為，就因為慈禧身邊個守舊派太多，才讓變法操作弗起來，個能，伊拉就建議光緒尋個機會，發動政變，拿慈禧做脫，好放開手腳，徹底搞改革。弗曾想，還嘸實施，風聲就已經穿出去，讓慈禧曉得哉。慈禧為保自家個地位，立馬召集榮祿、袁世凱，發動反制措施，奪回紫禁城控制權，軟禁光緒帝，停止所有改革，拿康有為個同黨譚嗣同等人捆綁到菜市口殺脫，康有為、梁啓超等跑路到日本，從此長期同慈禧對立。

因為西方列強儕希望看到光緒變法，好讓自家也加深參與清帝國活動個機會，所以伊拉對慈禧個重新上台，相當弗滿意，之後經常表達願望，希望好拿光緒放出來。弗過，迭個做法也進一步刺激到慈禧，讓伊認為洋人是存心反對自家。

慈禧確實想拿光緒廢脫，還為迭個目的選中過一個滿洲貴族年輕人當所謂個「大阿哥」（也就是皇太子），就在拉迭個階段，華北平原交關地方開始發生民間宗教發展出來個義和拳暴亂活動。拳民到處殺洋人，放火燒洋人個教堂，工廠，大阿哥為代表個滿洲貴族看到機會，故意拿伊拉放入北京，計劃用個幫人作為對付洋人個法寶。慈禧對義和團個真實水平認識比較清醒，弗過也曉得，幾十萬人萬一處理弗好，要出大事體。後勢來，伊決定用伊拉作為炮灰，攻擊洋人個東交民巷，逼迫洋人屈服。

1900年5月開始，義和團大規模對東交民巷發動圍攻，弗過因為慈禧並弗想讓伊拉真正成功，只弗過想教訓洋人一趟，所以，弗曾派多少正規軍幫忙，導致拳匪一致嘸辦法攻破東郊民巷。

1900年6月，八國聯軍在拉大沽口登陸，之後長驅直入，一路拿義和團之流儕滅脫。慈禧發覺事體失控，只好發揮傳統特技，又帶領清廷跑路，個趟一路西跑，去西安哉。

求和同新政

慈禧匆匆忙忙從北京跑路出來辰光，啥貴重物什也弗曾拿，又擔心畀聯軍捉牢，只好穿破爛衣裳，吃粗糧粗糠，一直到山西境內之後，生活條件才稍許好一點。之後，伊拉一路西竄，9月初（農曆）到達西安。

之後，伊委任李鴻章當全權代表，同洋人談判，最終簽訂辛丑條約，為讓洋人放過自家，伊基本同意洋人所有賠償同改革方面個要求，從此也改變對洋人個態度。

1902年10月，伊啟辰迴鑾，一路高頭路過河南、河北，沿途百姓、官員吹吹打打，為伊到來鋪路浪費，搞個好像是凱旋一樣。1903年1月，伊回到北京，並且開始清末新政，具體內容實際浪同之前戊戌變法區別弗大，主要是允許各地開自家個議會，並且在拉教育、文化事業高頭全面模仿西方。1905年，慈禧決定拿延續一千多年個科舉制度廢脫，從此清帝國全面執行近代化教育選拔體系。在拉軍事高頭，伊回來之後也徹底放棄之前個團練同舊軍隊，開始信任袁世凱個新軍，讓袁世凱在拉清庭個地位越來越高。1905年，慈禧下詔「預備立憲」，作為拉攏各地精英，對抗越來越流行個革命派個策略。

死脫同身後

1908年，慈禧身體開始弗適意，為避免自家死脫之後光緒重新上位，伊讓人拿光緒用毒藥殺脫，之後一天，慈禧自家也死脫哉。死之前，伊又選中第二代醇親王載灃個兒子溥儀繼承清帝國皇位，個就是宣統帝。

慈禧太后死脫之後，埋在清東陵，伊死脫之後第三年，辛亥革命爆發，清帝國滅亡。又十七年之後，慈禧個陵墓畀軍閥孫殿英挖掘，慈禧屍體畀挖出來，暴曬凌辱，有研究認為，這也是為啥後勢來溥儀要投靠日本個直接原因之一。

生平