欽璉

欽漣（約1684年—約1745年），浙江長興人，清朝官員。^[1]

生平

欽璉個生卒年份無得明文記載，必過根據渠個文集《虛白齋詩集》好推斷：乾隆甲子年（1744年）個辰光渠「六十初度」，蓋咾渠應該是康熙廿三年（1684年）生個；同治《長興縣誌》裡向講渠「年逾六十卒」，外加沈德潛搭《虛白齋詩集》作序個落款是「乾隆乙丑春三月」，就是1745年春天公，序文里向朆提到欽璉已經過世，蓋咾渠可能是1745年春天公以後過世個。^[1]

雍正元年（1723年）癸卯恩科進士。雍正四年（1726年）擔任新設個南匯縣知縣個職務，雍正十一年（1733年）再任同職，期間以工代賑重築原里護塘個預備塘，並改名為欽公塘。次年由楊羾天接任。

紀念

為仔紀念欽璉修築海塘，浦東各團全有紀念渠個祠堂。^[2]難朝只挺落來一隻欽公祠，勒垃浦東新區曹路鎮。根據《上海宗教志》，清朝光緒兩年，爲仔紀念欽璉，勒垃龍王廟濟手面增建仔欽公祠。1988年，大殿恢復，拿廟搭祠堂合垃一淘，叫龍王廟，1990年重新開放。^[2]

老底子每年八月十八祭祀龍王，十月十五祭祀欽璉，十五、十六兩日有廟會，叫「欽公會」，邪氣鬧猛；欽老爺出巡是模仿清朝知縣出巡個，各個鎮丄全有祭場，沿牢欽公堂望南，到南匯縣祝家橋，再到川沙城廂，再沿牢裡護塘一路望北，到搭高橋搭界個五號溝。^[2]難朝十月十五香客會得到曹路鎮個龍王廟祭祀欽公。^[2]

2025年2月份，曹路歷史文化館勒垃浦東新區曹路鎮川沙路845號開張，裏向有專門紀念欽璉個欽璉紀念館。^[3]