欽璉

钦涟（约1684年—约1745年），浙江长兴人，清朝官员。^[1]

生平

钦琏个生卒年份无得明文记载，必过根据渠个文集《虚白斋诗集》好推断：乾隆甲子年（1744年）个辰光渠“六十初度”，盖咾渠应该是康熙廿三年（1684年）生个；同治《长兴县志》里向讲渠“年逾六十卒”，外加沈德潜搭《虚白斋诗集》作序个落款是“乾隆乙丑春三月”，就是1745年春天公，序文里向朆提到钦琏已经过世，盖咾渠可能是1745年春天公以后过世个。^[1]

雍正元年（1723年）癸卯恩科进士。雍正四年（1726年）担任新设个南汇县知县个职务，雍正十一年（1733年）再任同职，期间以工代赈重筑原里护塘个预备塘，并改名为钦公塘。次年由杨羾天接任。

纪念

为仔纪念钦琏修筑海塘，浦东各团全有纪念渠个祠堂。^[2]难朝只挺落来一只钦公祠，勒垃浦东新区曹路镇。根据《上海宗教志》，清朝光绪两年，为仔纪念钦琏，勒垃龙王庙济手面增建仔钦公祠。1988年，大殿恢复，拿庙搭祠堂合垃一淘，叫龙王庙，1990年重新开放。^[2]

老底子每年八月十八祭祀龙王，十月十五祭祀钦琏，十五、十六两日有庙会，叫“钦公会”，邪气闹猛；钦老爷出巡是模仿清朝知县出巡个，各个镇丄全有祭场，沿牢钦公堂望南，到南汇县祝家桥，再到川沙城厢，再沿牢里护塘一路望北，到搭高桥搭界个五号沟。^[2]难朝十月十五香客会得到曹路镇个龙王庙祭祀钦公。^[2]

2025年2月份，曹路历史文化馆勒垃浦东新区曹路镇川沙路845号开张，里向有专门纪念钦琏个钦琏纪念馆。^[3]