江淮闲话

江淮閒話，又謳淮語，是中國江淮人使用個日常語言（弗過因為推普關係，立在一些江淮地區大城市也受到衝擊），通常算拉官話里向（「下江官話」、「江淮官話」）。

分布

江淮閒話主要分布來江蘇安徽兩省個長江搭淮河之間，故而得名。

江淮閒話來江蘇搭仔安徽個南許也有分布，江蘇南部個南京搭鎮江雖然鄉下還有講吳語個，城區儕是講江淮閒話個。安徽南部除脫徽州本生儕主要是講吳語個，太平天國運動之後，土著死到七零八落，外地移民人數浪超過本地人，里向又以安徽江北個移民為多，個了該歇城市裡向多數是講江淮閒話個；土著吳語主要只來拉有星鄉下頭講，而且還來浪慢慢教撥江淮閒話取代。

特點

江淮閒話來拉官話里向個突出特點主要是還保留中古漢語個入聲，形式浪是以喉塞音結尾個短元音，個末一般性典型個江淮閒話有陰平、陽平、上、去、入五個聲調。再一個典型個江淮閒話個韻母有單化個趨勢，咸山攝也經常性發成鼻化音。

對於講吳語個人來講，江淮閒話個另外一隻交關突出個腔調浪個特點就是俚個陰平多數讀低降調。

代表

江淮閒話一起先是南京話代表個，該歇蠻多人拿揚州話作為俚個代表。南京淮語也是南派北語系統個代表。

分片

一般性該歇拿江淮閒話分成功三片：洪巢片、通泰片搭黃孝片。

• 洪巢片是相對典型個江淮閒話。聲調只有5個，比普通閒話多一隻入聲。古全濁聲母個分化搭普通閒話一樣，即「平送仄不送」。

• 通泰片一般性撥拉認為是江淮閒話里向吳語底層頂頂豐富個一片，也好看成是吳語搭典型個江淮閒話個過渡閒話，有交關多搭吳語個共同詞彙。俚一般性有六七隻聲調，古全濁聲母一律讀送氣音，搭贛客語一樣。有學者拿箇片搭宣州、衢州個吳語一淘算作邊緣吳語。

• 黃孝片該歇有交關多人勿認為是江淮閒話。俚分布來湖北省，主要特點是入聲讀長調，勿讀一般江淮閒話個喉塞音，因為有入聲，所以就撥拉歸到江淮閒話里向。有星人認為俚實骨子是西南官話個原始形態，間接個證據是有講武漢閒話個入聲一徑到民國初年再嘸得個。

獨立

通常漢語一級分區應用濁音標準，拿江淮閒話算拉官話里向。必過從入聲個觀點出發，江淮閒話好搭晉語嘸啥兩樣個，應該從官話里㓰出來。

外鏈

• WIKIA高頭個淮語百科