汉字 - Wikiwand

发展

汉字历史悠久，古来便有黄帝辰光仓颉造字个传说。从相对来讲系统成熟个甲骨文算起，毛个有四千来年历史（个先头还有陶文等雏形）。细讲起来，汉字演变个过程交关复杂。如今公认顶早个汉字文本要算殷商个甲骨文。考古出土个龟甲、牛肩胛骨等文物嘞个内容以占卜为主。同期，铸造得青铜器高顶个，称为金文，貤喊得钟鼎文。在周朝晚期，出现上一种繁化个字体，籀文。个陀貤要引入一个概念——大篆。广义高顶，大篆泛指小篆先头个各种字体，而狭义高顶，大篆特指籀文（小篆由籀文演变而来，而大篆小篆专门对称）。到秦朝，李斯在籀文搭六国古文个基础高顶，刱制出小篆。而到汉朝辰光隶书逐渐取代篆书，成为主流。隶定成为古今文字个分水岭，直接催生真书——楷书。在汉字发展高顶还有草书、行书等等书法字体出现。

传播

历史高顶，汉字曾传到日本、朝鲜、琉球、越南，由此形成汉字文化圈。日本由汉字刱制出假名（日文：仮名）；用汉字训读伽个本土词；貤造上一些字，如雫榊畑。越南仿照汉字造上好些字，喊得喃字（越南文：𡨸喃）。境内个民族也曾借用或者借鉴仿造过汉字来书写自个语言，比方契丹、女真、僮族、白族、瑶族、侗族等等。汉字搭其个衍生文字一度繁荣。现今，朝鲜、韩国、越南已经纷纷个去汉化掉哈，通行汉字个地方还剩落中国大陆（简体中文）及港澳台地区（繁体中文）、新马地区（简体中文）搭日本。

构字

汉字个构字原理古人总结为六书,即象形、指事、会意、形声、假借、转注。顶早由许慎提出来。

象形，便寔指照事体个外形来造字个方法。比方,日月山水犬豕，种字便寔依象形法造个。
指事，寔一种抽象个造字法，比方“一”就寔划一横，“二”就寔划两横。“刃”个一点点得象形个“刀”个刀锋高顶，表示刀刃’
会意，寔独体个字根合起来组出新个意义。比方日月为“明”。
形声，寔声符加义符组成新字，比方，里，从衣里声。有种形声字个声旁也表意，比方，“返”字个“反”貤表示来还貤表音。形声字来现代汉字里向占个比例顶大。
转注，简单讲，就是一组字意思相同而弗同音，好互相注释个。六书里向，条一般认为寔“用字法”，许慎对其个具体含义解释忒省力，便介后世对其个解读可以话寔众说纷纭。
假借，寔用关系弗大大个某个字表记另外一个字。比方“云”本来寔个象形字，后来假借为说话个意思，为表示云彩个“云”貤造上个形声字“云”

事实速览