里斯伯格斯卡学校枪击案

歐洲中部辰光2025年2月4號，瑞典厄勒布魯個成人教育中心里斯伯格斯卡學校里向發生校園槍擊案，造成包括兇手至少11人死脫^[1][2]、15人受傷。瑞典首相烏爾夫·克里斯特松表示，箇樁槍擊案是瑞典歷史丄頂嚴重個大規模槍擊案^[3]。

 除特別註明外，箇隻頁面、條目或章節個辰光儕以歐洲中部辰光（UTC+01:00）為準。

背景

2023年，瑞典是歐洲人均槍支暴力事件頂多個國家^[4]。2020年代開始，幫派槍擊事件到處是，政府正想辦法積極打擊槍支暴力^[4][5]。

里斯伯格斯卡學校是一所市立成人教育中心，來勒厄勒布魯，幫多所教育機構共用教育設施，主要面向沒完成基礎或中等教育個人。事發個辰光，約莫2000名成人學生來勒箇埭讀書，課程有得高中程度教育搭仔針對移民個瑞典語課程^[6]。

槍擊案

老師瑪麗亞·佩加多回憶，伊聽到槍聲以後，連忙領仔15名學生子畔起來^[7]。校長英格拉·貝克·古斯塔夫森則表示，伊個辰光伊來勒吃中飯，冷陌生頭有學生衝進來通知大家立時三刻撤離；伊搭其他人躲進附近個二手商店個員工休息室里向^[8]。另外一名老師萊娜·瓦倫馬克表示，伊天仔學堂里向學生子比平時少交關，因為弗少人來勒全國考試結束以後已經回屋裏哉^[3]。

當地辰光下半天12點33分，當地警察收到報案^[9]，趕到現場以後同兇手槍戰，拿兇手當場打煞，嘸沒警員受傷^[1]。