ჯა
From Wikipedia, the free encyclopedia
ჯა — ხანგჷნძეთ მარინე ჩანარი, ნამუსჷთ მიარეწანიანი განჯალებური ღერი დო ჯინჯეფი უღუ. ბართვიშე გინორთი ჯაშ ღერი (შტამპი) დო ბორჯღი ირო ჯგირო გჷმოხანტილი რე. ღერო დო ნოჸელეფი აკმოდირთუ მარქვაშე დო ქორქიშე. ჯამონს ჯას უღუ მაღალი ღერი (დახე ცილინდრული) დო ჭიჭე, ძალამ მაღალას დვალირი ბორჯღი, გოფაჩილ აბანს — კუნტა დო ფსქელი ღერი, ბოეჯღჷთ უმოსი თუდოშე აჭყაფუ.
ჯა ფურცელეფიშ მეჯინათ ირთუ წვიწვამ დო ფართეფურცელამ გვარობეფო. მაართათ გიშეგორუაფუ ხოშქორამი იროწვანე ლიშიშობური ვარდა ქაცუშობური ფურცელეფით, ნამუთ აკმოქიმინუნს კოკოლეფს (კუკურეფს) დო ჭყერიშ კანკარეფს. თე ბუნას ორხველჷ სამანგათ, ფიჭვი, ნოჯი, სვაჭა, ლარიქსი, კვიპაროზი, სეკვოია. ფართეფურცელამი ჯალეფშ დჷმახასიათაფალი რე ფართე დო ბირტყა ფურცელეფი, ნამუეფიშ სისქა უმოსი კუნტა რე სიგჷნძაშე დო სიგანაშე. თეჯგუარ ჯაშ ფურცელეფი რჩქვანელობურო წანმოწანაშა ართშა დჷთმოცენს. თე ბუნას ორხველჷ ანჭა, წიფური, ლანჯი, ევკალიპტი დო შხვა.