Tâi-gú thong-iōng pheng-im
From Wikipedia, the free encyclopedia
Tâi-gú thong-iōng phing-im (hàn-gú: 臺語通用拼音 (Dāi-ghî tōng-iōng phing-im), kán-tshing DT, Tâi-thong phing-im/Tâi-thong; Tâi-lô phing-im: Tâi-gí Thong-iōng Phing-im; Bân-lâm phing-im: Dáiggì Tōngyông Pìngyīm), sī kin-kì Tiong-bûn thong-iōng phing-im huat sóo gián-tshòng (研創) tshut-lâi ê Tâi-gú phing-im hong-huat, sio̍k-î tsuân im-sòo bûn-jī ê tsi̍t-tsióng.[1][2] Lî-tshiánn Tâi-thong phing-im ê tiau-hō luī-sū Pe̍h-uē-jī ê tiau-hō, pīng-í tē-1 siann-tiāu (ko-pîng tiau) uî gú-im ki-tsún.[3][4]
Tâi-gú thong-iōng phing-im it-puann ha̍p im-tsiat (ha̍p-sû) phing-siá ê sî-tsūn lóng iōng piàn-tiau liáu-āu ê siōng-piau hû-hō lâi piau-kì si̍t-tsè siann-tiāu hām piàn-tiau ê jī-bió; pīng-tshiánn tsîng-āu ê im-tsiat ha̍p-sû í liân-jī hō lâi liân-kiat, tì-kàu khuànn-tio̍h jī-sû tio̍h ē-tàng khuài-sok lâi huán-thui guân-tiāu. Kí tsi̍t-ê huān-lē lâi suat-bîng: "Ài sùi m-giaⁿ lāu pîⁿ-zùi."("愛媠毋驚流鼻水"; "(tsa-bóo gín-á) ài-suí, tsun-kóng thinn-khì hân-líng mā m̄ kiann tshīng khah tsió") tang-tiong ê "m-giaⁿ(毋驚)" hām "pîⁿ-zùi(鼻水)" lóng sī ha̍p im-tsiat jī-sû. Tsóng-kiat lâi-kóng Tâi-thong phing-im ê siann-tiāu piau-sī ū nn̄g-tāi huat-tián, thâu-sing uī-tio̍h tsù-tiōng siann-tiāu ê si̍t-tsè im-ko tsáu-sè, hōo siann-tiāu piau-sī kah si̍t-tsè huat-im ê im-pîn tuì-tâng; koh-lâi tō sī in-uī bô tshái-iōng thuân-thóng ê Tâi-gú guân siann-tiāu piau-sī, hōo piàn-tiāu kui-tsik ē-tàng koh-khah si̍t-tsè kán-huà; tsìn-lî hōo Tâi-gú thong-iōng phing-im ē-tàng koh-khah tsū-jiân iōng lating jī-bió lâi su-siá Tâi-gú bûn.[5]