Tek-hoè-koān

Tek-hòe-koān (德化縣, Tek-hoè-kūiⁿ) sī Tiong-kok Hok-kiàn-séng Choân-chiu-chhī koán-hat ê chi̍t-ê koān (Tek-hòe-ōe: kūiⁿ). Tiong-kok hiān-tāi tù-miâ ê hûi ê seng-sán ki-tē. 1996-nî hō͘ kok-bū-īⁿ hoat-tián gián-kiú-tiong-sim hō-miâ "Tiong-kok tô-chû chi hiuⁿ" (中國陶瓷之鄉), 2003-nî phêng-ûi "Tiong-kok bîn-kan (tô-chû) gē-su̍t chi-hiuⁿ", tek-kàu "Tiong-kok Chû-to͘ - Tek-hòe" ê miâ-chheng, sêng-ûi Tiong-kok kó͘-tāi 3-tāi Chû-to͘ ê chi̍t-ê^[1]. Bīn-chek 2220 pêng-hong kong-lí, jîn-kháu tāi-iok 30-bān, koān jîn-bîn-chèng-hú chù-tē tī Sîm-tiong-tìn.

Le̍k-sú Iân-kek

Tn̂g-tiāu kong-khí 2-nî (886-nî), ÔNG Sìn-sîn khek Choân-chiu, in sió-tī ÔNG Sím-ti chhòng-ji̍p Bân-kok.

Bân-kok liông-khí goân-nî (933-nî), í Éng-thài-koān Kui-tek-tiûⁿ tì Tek-hòe-koān.

Sòng-tiâu sio̍k Choân-chiu, Goân sio̍k Hok-kiàn Hêng-séng Choân-chiu-lō͘.

Bêng-tiâu sio̍k Choân-chiu-hú.

Chheng-tiâu Iong-chèng sî kóe sio̍k Éng-chhun Ti̍t-lē-chiu.

1950-nî 10-goe̍h, kui Choân-chiu.

Hêng-chèng Khu-e̍k

Hat 11-ê tìn, 7-ê hiuⁿ:

• Tìn: Sîm-tiong-tìn, Lêng-sîm-tìn, Sam-pan-tìn, Liông-mn̂g-thoaⁿ-tìn, Lûi-hong-tìn, Lâm-tiâⁿ-tìn, Chúi-kháu-tìn, Chhiah-chúi-tìn, Koah-khiⁿ-tìn, Chiūⁿ-éng-tìn, Kài-tek-tìn.
• Hiuⁿ: Iûⁿ-mûi-hiuⁿ, Thng-thâu-hiuⁿ, Kùi-iông-hiuⁿ, Kok-pó-hiuⁿ, Bí-ô͘-hiuⁿ, Tāi-bêng-hiuⁿ, Chhun-bí-hiuⁿ.

Tē-lí

Í tiong-koân kah khah-kē ê soaⁿ-tē ûi-chú, chòe-koân ê soaⁿ sī Tè-hûn-soaⁿ, hái-poa̍t 1856-bí, tī koān tiong-sim-pō͘.

Kau-thong

• 203 séng-tō
• 206 séng-tō
• Choân-3 ko-sok-kong-lō͘ Tek-hòe liân-chiap-sòaⁿ.
• Hā-sa ko-sok-kong-lō͘

Keng-chè

Chú-iàu í hûi chhut-kháu ûi-chú, keng-chè sán-gia̍p khah tan-it.

Chit kúi-nî lâi, le̍k-sek seng-thài kah lú-iû ū khai-sí hoat-tián.

Bûn-hòa Kàu-io̍k

• Sió-o̍h:

• Tiong-o̍h: Tek-hòe 1-tiong

• Tōa-o̍h: Choân-chiu Kang-gē Bí-su̍t Chit-gia̍p Ha̍k-īⁿ (Goân "Tek-hòe Tô-chû Ha̍k-īⁿ")

• Tek-hòe Bûn-biō

Hong-kéng Bêng-sèng

• Tè-hûn-soaⁿ (戴雲山): chit-kú sī Tè-hûn-soaⁿ chū-jiân-pó-hō͘-khu.
• Chio̍h-gû-soaⁿ (石牛山)
• Tài-sian pho̍k-pò͘ (岱仙瀑布)
• Kiú-sian-soaⁿ (九仙山): tī Chhiah-chúi, Chiūⁿ-éng, Tāi-bêng 3-ê hiuⁿ ê kái-kàu-chhú, hái-poa̍t 1658-bí, bīn-chek io̍k 35 pêng-hong kong-lí.

Tek-hòe Miâ-lâng

• Hô Tiâu-chong (何朝宗): Tek-hòe bêng-tiâu ū-miâⁿ ê tô-chû gē-su̍t-ka. Chok-phín chú-iàu sī koan-im kah ta̍t-mô͘ téng-téng thoân-thóng ê pu̍t-kàu jîn-bu̍t tiau-sok. Chok-phín chit-kú ū tī Kò͘-keng Phok-bu̍t-īⁿ kah Tāi-eng Phok-bu̍t-koán téng ū-miâⁿ ê phok-bu̍t-koán siu-chông.

Te̍k-sán

• Hûi: Tek-hòe sī chû-to͘, sī Tiong-kok kok-lāi ū-miâⁿ ê hûi ê seng-sán-tē.
• O͘-koe: Tek-hòe o͘-koe sī Tiong-kok tē-lí piau-chì sán-phín.
• Tê-iû: ū tōa-tê-iû kah sió-tê-iû nn̄g-chéng.
• Kim-chiam
• Khó͘-chhài: Kah Choân-chiu ū-ê-lâng m̄-pat sim-mih sī khó͘-chhài bô-sâng, Tek-hòe kah bân-tang ū-ê só͘-chāi sâng-ê, ū chia̍h khó͘-chhài.