九龍寨城
香港九龍城嘅一個人口聚居地 / From Wikipedia, the free encyclopedia
九龍寨城(粵拼:gau2 lung4 zaai6 sing4)係香港九龍城區入面一座圍城,喺1993年拆咗。九龍寨城又被人叫做九龍城寨(gau2 lung4 sing4 zaai6),亦有人寫做九龍城砦(「砦」通「寨」),因為舊時九龍城寨嘅城池只係用石頭起出嚟,所以以前啲人鍾意叫呢度做城砦,即九龍城砦。喺香港史上,呢個地方曾經係一個引起好多政治爭論嘅敏感地方,又曾經係一個出名「三不管」嘅神秘地帶。喺1987年香港政府宣佈清拆城寨,引起社會關注,最後落實分三期進行清拆,而家九龍城寨已經變咗做一個公園,叫做九龍寨城公園。
九龍城寨喺九龍灣中心,由鯉魚門南行嘅船都一定會經過,而且重係沿海重要嘅戰略地點,不過喺20世紀二三十年代因為填海起啟德機場,九龍灣就唔再係海港。
清拆前嘅九龍城寨其實並唔係 「三不管」 狀態,而係一笪有郵差、警察巡邏同政府供電嘅地方[1]:33:57。