友情
From Wikipedia, the free encyclopedia
友情(粵拼:jau5 cing4)係一種人類感情,亦係一種人倫關係,係社會範疇嘅事物,呢種情感關係建基於相互之間嘅信賴、共情、以及對對方嘅肯定同尊重,有呢種感情嘅人,會關心、幫助對方,會關注對方嘅感受。友情關係唔限人數,可以係兩個人之間嘅友情,亦可以係一大班人之間都有友情;友情維持嘅時間亦有長有短,可以係素昧平生嘅一面之緣,亦可以係成世老友乃至世交。有呢種感情關係嘅人互相稱之爲朋友,朋友之間通常無血緣關係,不過記掛、友愛、相處方面唔輸蝕過親人。不過唔係所有嘅朋友都會有友情,有時朋友關係出於利益交換,又或者單純係唔覺對方乞人憎,真正嘅友情係要有足夠嘅自我犧牲、爲對方着想、互相幫助、互相安慰、共同進步。