口痕搵嘢食
除咗食飯之外, 仲食多啲嘢食 / From Wikipedia, the free encyclopedia
口痕搵嘢食(英文:grazing [註 1]),或者叫口痕摷嘢食,係一種食嘢相關嘅人類行為規律。如果話一個人口痕搵嘢食,意思係指呢個人重複又冇計劃噉走去搵嘢食,次次都只係少量噉食,而且明明唔覺餓都走去搵。口痕搵嘢食可以係一種唔想做都忍唔住去做嘅行為[1],個人好多時食咗之後會感到內疚等嘅負面感受,因而為個人造成心理壓力[2]。
啲人口痕搵嘢食嗰陣,特別傾向去食一啲細細哋一件件、唔使點樣花費精神就可以食得嘅零食。例如想像而家有個人喺櫃入邊收埋咗啲曲奇餅。佢喺屋企無所事事就會想去開櫃攞曲奇餅嚟食(重複),每次都淨係食一塊咁少(少量),每塊曲奇餅唔使花咩工夫準備,會為佢帶嚟小小嘅快感。