和音
From Wikipedia, the free encyclopedia
和音(粵拼:wo6 jam1;英文:harmony)喺樂理上係指若干個同時出現但音高等特性上有異嘅聲,同埋聽首音樂嗰個人對呢啲聲嘅感知。亦都可以包埋啲音符喺出現時間上相近得好交關,令聽嘅人覺得呢幾個音符係同時出現嘅:例如係想像一座鋼琴,彈嗰個人一嘢三隻手指同時撳落去中 C、對上嗰個 E 音(E4)同對上嗰個 G 音(G4)呢三個 key 嗰度,令到呢幾個音符一齊出現,就可以算係一吓和音[註 1][1]。
和音可以包埋琶音(arpeggio)等嘅分解和弦,分解和弦意思係指可能嗰柞音符實質上唔係同時出現嘅,但佢哋之間嘅時間差好短,令到聽嘅人覺得佢哋係同時出現,或者最少將佢哋視為同一嚿物體,呢種情況常見於笛或者小號等唔能夠同時發出多過一個音符嘅樂器[2]。