噶廈
From Wikipedia, the free encyclopedia
噶廈(威利轉寫:bkaʼ-shag, 藏文拼音:བཀའ་ཤག་)或譯「噶沙」,係噶倫辦理政事嘅地方,舊時曾經係西藏嘅行政中心[1]。喺藏語又叫做第巴雄(威利轉寫:sde pa gzhung, 藏文拼音:སྡེ་པ་གཞུང་,「第巴政府」)、博雄(威利轉寫:bod gzhung, 藏文拼音:བོད་གཞུང་,「西藏政府」)[2]。呢個機構喺清代乾隆十六年(1751年)成立。噶廈駐地喺拉薩大昭寺,長官係噶倫,跟達賴喇嘛(事實上係西藏攝政)指示做嘢。1912年清朝滅亡之後,駐藏大臣等等清朝官員返返去漢地。十三世達賴喇嘛返入西藏掌握軍政實權。之後由1912年到1959年期間,噶廈成為事實上嘅西藏政府。
1959年,十四世達賴喇嘛流亡去印度,中華人民共和國政府廢除噶厦,籌備建立西藏自治區。有啲噶廈官員亦都跟住達賴喇嘛流亡咗去印度。同一年,十四世達賴喇嘛喺達蘭薩拉成立西藏流亡政府,個流亡政府嘅內閣就叫做噶廈。