寵物小精靈
From Wikipedia, the free encyclopedia
寵物小精靈(粵拼:Cung2 mat6 siu2 zing1 ling4;日文:ポケットモンスター,發音:Pokettomonsuta),而家任天堂官方中文名叫寶可夢(粵拼:bou2 ho2 mung6),係由日本公司 Game Freak 嘅代表田尻智喺 1995 年開發,日本任天堂株式會社喺 1996 年開始推出嘅一個以遊戲做主嘅系列。佢嘅內容係圍繞住一班叫做「精靈訓練員」嘅人類捉「寵物小精靈」 - 一柞有神奇力量嘅架空生物 - 同訓練佢哋去打交嘅故仔。
開頭嗰陣,寵物小精靈係喺 Game Boy 度出嘅 RPG 遊戲(紅、綠)。遊戲嘅玩法係玩嗰個人扮演一個想做精靈訓練員大師嘅細路,喺隻遊戲入面嘅(架空)世界一路旅行一路捉路上撞到嘅唔同品種嘅精靈,跟手透過打交提升手持精靈嘅等級去同更加勁嘅對手打,最後稱霸成個地區。因為隻 Game 當時出乎意料咁好賣,話咁快寵物小精靈重出埋咭 Game、動畫、漫畫、戲、同好多種玩具,做埋風靡全世界嘅大熱系列。到咗今時今日,寵物小精靈嘅總值只係低過(都係任天堂出嘅)超級馬利奧系列少少,係歷史上第二好賣嘅遊戲系列。個系列喺 2016 年為咗慶祝廿週年,特登喺 Super Bowl 50 嗰度打廣告[1],出咗破格嘅 Pokémon GO 手機遊戲,同埋重新設計過隻遊戲嘅玩法。
目前出咗嘅 RPG 型寵物小精靈遊戲包括:紅、藍、黃、綠(第一代,出喺 Game Boy)、金、銀、水晶(第二代,Game Boy Color)、紅寶石、藍寶石、綠寶石、火紅、葉綠(第三代,Game Boy Advance)、鑽石、珍珠、白銀、心金、魂銀(第四代,NDS)、黑、白、黑2、白2(第五代,都係NDS)、X、Y、終結之紅寶石、始源之藍寶石(第六代,3DS)、太陽、月亮、究極之日、究極之月(第七代,都係 3DS)、Let's Go 比卡超、Let's Go 伊貝(第七代,Switch)、劍、盾、晶燦鑽石、明亮珍珠、傳說 阿爾宙斯(第八代,Switch)、朱同紫(第九代,Switch)。每隻遊戲個名都係象徵咗做佢封面嗰隻寵物小精靈(俗稱「封面神獸」)。除咗 RPG,呢個系列重出咗其他類型嘅遊戲,例如係喺手機度出,屬於擴張現實型嘅「Pokémon GO」。
初頭個系列入面有 151 個品種嘅寵物小精靈,佢哋每一種都有神奇力量:曉噴火、放電、飛天、鑽地、扭曲時空、控制亡魂呀咁。而且每出一代新遊戲都會出新嘅品種。直至而家(第九代),已經有成 1,008 個品種嘅寵物小精靈。