廣彩
From Wikipedia, the free encyclopedia
廣州織金彩瓷,簡稱廣彩,(粵拼:Gwong2 coi2;英文名係「Canton porcelain」或者「Cantonese porcelain」)。佢係一種喺啲白瓷器皿上面彩繪再燒製而成嘅工藝品,出名在色彩絢麗、金碧輝煌、構圖嚴謹、繪工精細,畀人嗌做中國四大名瓷之一。呢種工藝開頭係喺 16 世紀尾橛嘅大明時期,已經有成過四百年歷史。嗰時廣東啲粵人由江西景德鎮嗰度運啲白瓷過嚟,再喺廣州嗰度幫啲瓷器油顏色、加圖案、再燒。喺呢種風格身上睇得到明朝文化嘅影子,但係佢又加咗啲西人嘅風格喺入面,例如係《竹園陶說》就咁樣講:「清代中葉,海舶雲集,商務聚盛,歐土重華瓷,我國商人投其所好,乃於景德鎮燒造白瓷,運至粵垣,加僱工匠,仿照西洋畫法,加以彩繪,於珠江之河南,開爐烘染,製成彩瓷然後售之西商。」