樂理
From Wikipedia, the free encyclopedia
音樂理論(粵讀:jam1 ngok6 lei5 leon6;英文:music theory),簡稱樂理,泛指對音樂嘅理論性質研究[1]。喺最基本上,樂理研究集中於藝術方面嘅思考:研究者會留意一段音樂嗰啲聲嘅物理性質-包括係啲音符嘅音高(音高反映一吓聲嘅頻率)同埋首音樂嘅節奏(簡單講係指啲聲喺時間當中嘅擺位)呀噉;佢哋會用樂譜嚟表達呢啲性質,例如根據現代慣例,一個音符喺條五線譜上面位置有幾高表示個音符嘅音高,個音符位置愈高表示佢愈高音。清楚記錄咗一首樂曲嘅物理性質之後,研究者就會分析呢啲物理性質會點樣影響首曲係咪「有美感」-係咪能夠令聽嘅人有賞心悅耳嘅感受[2][3]。
除咗藝術性質嘅研究之外,樂理仲可以包埋哲學同科學層面嘅思考:喺哲學方面,「乜嘢係音樂」呢條定義上嘅問題到咗廿一世紀初都仲係有好多學者喺度詏緊,例如曾經有人提出音樂可以定義做「一段有組織嘅聲」,但話咁快就俾人指出佢個定義有甩漏-人講嘢嘅聲都係一段段有組織嘅聲,所以啲學者跟住又開始咗對音樂嘅定義作出爭辯[4],而且音樂係門藝術,所以美感呢樣嘢一般都認為對音樂嚟講好緊要,但「靚」呢個概念要點定義又係一條大問題[5];响另一方面,由 19 世紀中開始就有人對音樂做科學性質嘅研究,音樂心理學嘗試將心理學上嘅知識應用落去音樂嗰度,簡單例子有用心理實驗方法剖析音樂引起嘅感知體驗同邊啲腦區有啦掕[6]。廣義上,呢啲哲學同科學性質嘅研究冚唪唥都屬樂理嘅範疇之內。
樂理呢家嘢歷史好悠久:根據考古學上嘅研究,早喺公元前 1,500 年咁古老嘅兩河流域文明嗰時經已有人喺度對音樂作出理論思考,會用佢哋嘅一套行話表達音樂上嘅概念[7];而廿一世紀分析音樂嗰陣實會用到嘅五線譜就最少可以追溯到去 11 世紀早期(即係中世紀中期)嘅意大利嗰度[註 1][8]。到咗廿一世紀初,樂理經已成為咗套龐大嘅理論體系,有齊成套樂譜方法嚟表示同記錄音樂,而對於樂理嘅藝術、哲學同科學研究仲產生咗大量嘅文獻資料-鍾意音樂嘅學者同第啲工作者都會寫文獻嚟傾樂理方面嘅嘢,交流對音樂嘅見解[9]。