港鐵特惠站
From Wikipedia, the free encyclopedia
港鐵特惠站(英文:MTR Fare Saver,以前叫地鐵特惠站)係一種提供港鐵車費優惠嘅電腦終端機。只要喺搭港鐵之前,用成人八達通卡嘟一嘟部終端機,去到指定港鐵站拍卡入閘,大部分完成車程後就可以平HK$2。但亦有特別嘅特惠站,例如曾經有個喺昂坪嘅特惠站提供由港鐵東涌站前往任何一個前地鐵車站(機場快綫除外)嘅免費優惠(適用於任何八達通卡),以及位於紅磡站入境大堂禁區嘅特惠站可以慳HK$5[1];家陣亦有特別嘅特惠站,例如位於新渡輪(澳門)高速雙體船上嘅特惠站可以慳HK$6。
![Thumb image](http://upload.wikimedia.org/wikipedia/commons/thumb/1/17/HK_Yaumatei_%E9%A7%BF%E7%99%BC%E8%8A%B1%E5%9C%92_Prosperous_Garden_%E6%B8%AF%E9%90%B5%E7%89%B9%E6%83%A0%E7%AB%99_MTR_Fare_Saver_1.jpg/640px-HK_Yaumatei_%E9%A7%BF%E7%99%BC%E8%8A%B1%E5%9C%92_Prosperous_Garden_%E6%B8%AF%E9%90%B5%E7%89%B9%E6%83%A0%E7%AB%99_MTR_Fare_Saver_1.jpg)
港鐵特惠站喺2002年由當時嘅地鐵公司(家陣叫港鐵公司)同八達通合作開發,設喺部份香港商場,佢哋都係比較遠離港鐵站出口,但港鐵嘅潛在乘客不時到訪嘅地方。港鐵特惠站係一種三贏方案,港鐵可以用有效特惠價方法,爭取更多為慳車資而改變主意嘅顧客。港鐵亦可以知道乘客嚟自邊度,可以作出人流數據分析。
優惠係由當時嘅地鐵公司設立。因此,喺兩鐵合併後初期只適用於前地鐵車站(機場快綫除外),而喺前九鐵嘅車站入閘都要畀正價車費,以及憑相關八達通轉乘前九鐵路綫時,亦可享有再入閘費調減。統一票務系統後優惠就開始擴展至港鐵全綫。例如:
- 設立喺盈暉家居城嘅特惠站原本只適用於喺美孚站搭荃灣綫,直至2008年9月28號優惠隨港鐵統一票務系統工作完成而擴展至適用於包括搭西鐵綫(現時屯馬綫)[2]嘅乘客。
- 設立喺半島中心及海港城嘅特惠站原本只適用於尖沙咀站,即使2008年9月28號港鐵統一票務系統工作完成,優惠都冇擴展至另一個獨立車站尖東站;2008年12月2號,半島中心嘅特惠站優惠至擴展至同時適用於尖東站[2],而海港城嘅特惠站直至2009年8月16號優惠隨九龍南綫通車而擴展至同時適用於柯士甸站。
港鐵大部份車站成人車資(用八達通卡)最低票價為HK$3.7,用咗特惠站之後,車費會減至HK$1.7,比相同車程嘅特惠車資最低票價HK$2.4重要平。
2009年7月1號,港鐵喺深圳地鐵福田口岸站收費區內增設適用於落馬洲站嘅特惠站,有HK$3車費回贈,曾經係唯一一個設喺香港境外嘅特惠站以及曾經係所有特惠站中最高嘅優惠金額。至7月18號,港鐵位於紅磡站城際直通車入境禁區嘅特惠站,用嗰個特惠站之後喺紅磡站入閘搭市區線,可享最多HK$5[1]車費回贈(已經喺2010年1月18號取消)。
2010年7月19號,港鐵喺新渡輪(澳門)高速雙體船上(澳門往九龍)增設適用於柯士甸站、尖沙咀站嘅特惠站,提供HK$6車費回贈,優惠金額係所有特惠站中最高嘅。