美杜莎之筏
法國嘅浪漫主義油畫作品,收藏喺羅浮宮 / From Wikipedia, the free encyclopedia
美杜莎之筏 | |
---|---|
法文: Le Radeau de la Méduse | |
畫家 | 舍希戈 |
時間 | 1818年~1819年 |
類型 | 布面油畫 |
思潮 | 浪漫主義 |
題材 | 歷史畫 |
尺吋 | 491 × 716 cm, 193.3 × 282.3 in |
位置 | 巴黎羅浮宮 |
幅畫嘅尺吋係491厘米乘716厘米(193,3 in × 282,3 in)[1],係實物大嘅繪畫。呢幅畫嘅畫面係法國海軍嘅巡防艦美杜莎號沉咗之後啲生還者嘅求生場面,呢場海難發生喺1816年7月2號位於而家屬毛里塔尼亞嘅海域。海難當時至少有147人生還,佢哋喺齊曬一隻自製嘅木筏上面漂流,佢哋漂流咗13日先畀人救起,不過嗰陣時就得番15人倖存,期間佢哋無水無食,甚至要靠食屍來頂肚。呢件事後來變成國際醜聞,好大程度上導致呢場海難嘅係個法國船長失職無能,而呢個船長係法國復辟王朝任命嘅。不過實際上,當時嘅路易十八無權任命船長,個皇帝並無直接參與入呢件事度。美杜莎號船長係Chaumareys子爵,任命貴族做船長係法國海軍內部嘅慣例[2]。
喺選題上個畫家之所以揀呢個發生咗無幾年嘅出名悲劇,就係想撩起大眾輿論關注,嚟發展佢嘅畫家事業[3]。由此佢好畀心機,喺正式成品前,佢做咗好多對呢單海難嘅調查,同時喺畫時亦畫咗好多次草稿。佢採訪咗其中兩個倖存者,重整埋隻木筏嘅精細模型。佢重入啲醫院、太平間,去觀察死屍嘅色澤、紋理同埋人死時嘅樣。正如個畫家所料,幅畫喺1819年喺巴黎展覽度第一次展出時,就引起咗好大關注,有好多人讚,亦有相當人彈。雖然係噉,呢幅畫重係搏得國際名聲,今日重評做係法國畫史上早期浪漫主義嘅開路先鋒。
雖然《美杜莎之筏》有傳統歷史畫嘅元素,不過佢嘅選題引人關注、畫風戲劇,呢啲都破咗當時新古典主義嘅教條約束。構圖方面,佢避開咗當時嘅平面展開,用咗金字塔形構造,強化出希望同感動嘅焦點。
呢幅畫喺第一次亮相後幾乎立即爲畫家贏廣泛注意,之後呢幅畫喺倫敦展出。喺畫家32歲死時,幅畫畀羅浮宮收藏咗。呢幅畫嘅影響好大,佢嘅影響可以喺之後嘅多拉夸、透拿、古比、馬內嘅畫作度明顯見到。