胡桃夾子
From Wikipedia, the free encyclopedia
《合桃鉗》(粵拼:hap6 tou4 kim2*4)-官話化[註 1]啲嘅就叫做《胡桃夾子》-係一齣兩幕嘅古典芭蕾舞劇,由俄羅斯作曲家柴可夫斯基作曲,史上首次公演於 1892 年[1]。
《合桃鉗》取材自《合桃鉗同老鼠王》(德文:Nussknacker und Mausekönig)呢個短篇故仔。齣劇用聖誕節做主題,講到細路女卡拉娜由佢教父嗰度收到一份特別嘅聖誕禮物-一個軍官造型嘅合桃鉗;卡拉娜好鍾意個合桃鉗;當晚卡拉娜半夜靜靜雞走去客廳睇個合桃鉗,最後仲攬住個合桃鉗睏著;等到卡拉娜再擘返大眼嗰時,就發現自己縮細咗,仲俾班老鼠包圍,合桃鉗出手救返佢,兩個人然後仲一齊合力擊退入侵客廳嘅老鼠王同老鼠軍團;打後卡拉娜同合桃鉗鍾意咗對方,而喺第二幕,合桃鉗變咗身做一個靚仔嘅王子,兩個人一齊進入一個神奇魔法世界,參與糖梅仙子嘅舞會[2]。
喺編舞上,多數版本嘅《合桃鉗》都會有某啲固定嘅元素:第一幕嘅高潮會有飾演卡拉娜以及合桃鉗嘅男女主角舞蹈員同打扮成老鼠噉嘅一班男舞蹈員跳舞,老鼠軍團當中入面會有個人演老鼠王,表達「卡拉娜同合桃鉗合力同老鼠軍團戰鬥」嘅情節[2];除此之外,雪花之舞亦係《合桃鉗》好出名嘅一段,多數做第一幕嘅結尾或者第二幕嘅起始,涉及多位配角女舞蹈員著起藍白色嘅裙扮演雪花,一齊團隊跳段輕飄飄噉嘅舞,營造好似漫天白雪噉嘅氣氛[3]。
《合桃鉗》初頭唔算好受歡迎,而且因為以玩具同聖誕禮物做主題,俾人覺得佢細路仔得滯,但係柴可夫斯基同齣劇作嘅樂曲就大受好評。打後喺 1960 年代上演嘅完整版本就得到空前嘅成功。到咗廿一世紀初,《合桃鉗》經已係世上其中一套最出名嘅芭蕾舞劇,成日俾人攞嚟返炒,仲喺歐美地區成為咗聖誕節嘅一個象徵[2][4]。