萬福瑪利亞 (舒伯特)

From Wikipedia, the free encyclopedia

萬福瑪利亞maan6 fuk1 maa5 lei6 aa3》(拉丁文Ave Maria,當中 Ave 讀音似廣東話掗菲ngaa6 fei1」-成句嘢係拉丁文入面「萬福瑪利亞」噉解)係由奧地利作曲家舒伯特喺 1825 年作嘅一首,係舒伯特最出名最受歡迎嘅作品之一[1][2]

1530 年奧地利一幅油畫描繪畫家想像中聖母瑪利亞抱住耶穌嘅情景。
《萬福瑪利亞》;伴奏鋼琴,唱嘅人唱德文歌詞

《萬福瑪利亞》係首浪漫詩歌德文:Lied),最常見係由一位女高音喺一件樂器伴奏下唱嘅,不過首歌都可以攞嚟做純器樂噉奏,又或者由女高音以外嘅歌手唱,例如舉世聞名嘅意大利男高音巴伐洛堤就喺 1994 年嗰陣公開演唱過呢首歌[1]

喺廿世紀至廿一世紀初嘅基督教地區,《萬福瑪利亞》有咁上下嘅文化影響力:呢首歌啲歌詞係喺度歌頌緊聖母瑪利亞(基督教入面最重要嘅人物之一)嘅純潔,有宗教意涵,而且首歌嘅旋律俾人覺得好祥和平靜,有安慰嘅效果;所以啲人成日都會攞呢首歌喺喪禮度唱或者播[1][3];除此之外,甚至仲有唔少大眾媒體產物(包括電影電子遊戲)有攞呢首歌做佢哋配樂嘅一部份[4]