From Wikipedia, the free encyclopedia
董嘉儀(英文藝名:LuLu,花名:大埔Lulu、燈神,英文原名:Nicole[4],1993年8月4號—)係香港now TV節目主持人、兼職模特兒同埋香港地區足球會大埔足球會嘅足球大使,屬505聯合製作(505 United)旗下嘅一分子。
董嘉儀 | |
---|---|
董嘉儀響SEGA創造球會盃賽,MegaBox(2014年9月13號) | |
女藝人 | |
羅馬拼音 | Tung Ka-Yee |
英文名 | Nicole、Lulu |
花名 | 大埔LuLu |
國籍 | 中國(香港) |
出世 | [1] 英屬香港 | 1993年8月4號
屋企 | 香港 |
職業 | 模特兒、主持 |
語言 | 粵語、英文、國語 |
教育程度 | 高級文憑 |
母校 | 嶺南大學香港同學會小學[2] 香港青年協會李兆基小學 天水圍循道衛理中學[3] 香港酒店旅遊學院 |
出道地 | 香港 |
出道日期 | 2010年 |
活躍年代 | 2010年到而家 |
經紀公司 | Zmodel.com Unique Model Limited Pure Models 屬505聯合製作(505 United) Sunny Idea(2017年3月至2022年) |
相關團體 | Lady_R |
董嘉儀有香港酒店旅遊學院高級文憑,讀緊書嗰陣已經做兼職模特兒。
2010年,董嘉儀做咗賣運動器材產品嘅「FitBoxx元氣館」代言模特兒,而「FitBoxx元氣館」就做咗嗰時香港甲組足球聯賽地區球會大埔足球會新贊助商,所以董嘉儀就做咗大埔足球會嘅足球大使,喺每場大埔有份打嘅港甲賽事入面打氣同派宣傳嘢,又做過大埔球會官方月曆嘅主角,所以畀人叫做「大埔Lulu」,開始有唔少香港球迷識得佢。教過大埔嘅張寶春,更大讚Lulu加入大埔咁耐以嚟,每次有賽事舉行,都一定出席支持同打氣,大大刺激咗場內同場外嘅士氣,更成功令大埔球迷更有凝聚力,Lulu功勞好大。
2013年5月4號,香港甲組聯賽出現前所未見嘅「護級生死大亂鬥」,大埔要同太陽飛馬、橫濱FC(香港)、公民及日之泉JC晨曦,都一定要贏波,至可以護級成功,留喺甲組。香港足總亦破天荒將4場重要大戰,喺同一時間,喺唔同嘅球場舉行。大埔作客小西灣運動場,迎戰橫濱FC(香港)。Lulu帶領大埔球迷打氣,令場內氣氛升溫。90分鐘,因當時公民同埋晨曦都贏波,護級成功,令大埔同橫濱FC(香港),將肯定有一隊降班。安達為大埔射成2:1,Lulu同大埔球迷一度興奮慶祝,點知短短1分鐘之後,被主隊嘅福田健二門前射入,扳平2:2,令大埔喺最後一刻,宣告護級失敗,乙組再見。Lulu喺賽後泣不成聲,但亦喺訪問中揚言,會全心全意繼續為大埔打氣,睇大埔嘅比賽,一日係大埔Lulu,一定唔會離棄大埔。2013/14年度乙組聯賽,大埔表現出色,Lulu亦真係有口齒,盡量出動為大埔打氣。
Lulu由2011年開始,幫「波波池」做足球大使,最初著起波衫影相,做賽事預告,其後更喺每個星期推出Video版本嘅大戰預告,惡搞當時流行嘅話題,作為Video題材,包括「十四巴港女」、「吃漢堡包的女朋友」、「朗誦示範」等等。Lulu生動又鬼馬嘅演出,令「波波池」瀏覽及Like人數急劇上升。家陣「波波池」嘅Like人數,已經突破90,000人。
Lulu喺大部份影片中,都會着上同賽事有關嘅球隊波衫,但喺2013年,佢嘅推介經常出事,強如佢嘅愛隊阿仙奴,或其餘班霸包括曼聯、曼城、車路士、利物浦、皇家馬德里、巴塞隆拿、拜仁慕尼黑等,無一隊倖免。只要Lulu着上佢哋嘅波衫,球隊即輸,着邊隊,邊隊輸。因而被網民稱為「燈神」,即係話佢「燈死」晒啲球隊,買波嗰陣就買Lulu愛隊嘅對手,「買對面」。好彩,佢喺2013/14年度嘅歐聯十六強首回合,力挽狂瀾,貼中晒2月18號同2月19號嘅巴塞隆拿、巴黎聖日耳門、拜仁慕尼黑同埋馬德里體育會,全部作客贏波,總算一吐烏氣,但佢仍然係唔少賭波人士嘅「明燈」。
喺2014年FIFA世界盃第一輪,Lulu推介咗克羅地亞同埋西班牙兼着埋佢哋嘅波衫,結果兩隊都分別以1-3同1-5慘敗畀巴西同荷蘭。其後英格蘭同埋日本都同樣避唔過呢個「Lulu效應」,喺第一場小組賽事輸畀對手,令人對佢更加深信不疑,係指路明燈。其後推介德國贏葡萄牙2-1,Lulu一講出貼士好多人都覺得德國今次實死冇生,但最後德國以4-0大炒葡萄牙。雖然唔中波膽,但大部分人留言Lulu終於「破燈」。不過有傳由於Lulu鍾情德國,所以係德國對葡萄牙期間着住葡萄牙波衫「邪」住葡萄牙,令「破燈」說法存疑。
Lulu人氣急升,香港高登討論區更侵埋佢玩,候選「第二屆高登女神總選」,結果Lulu得到30票,當中7票屬於首名票數,以70分,成為第12位嘅高登女神。Lulu更獲得「Cool魔」張智霖嘅邀請,聯同另外五位高登女神:謝安琪、陳法拉、杜小喬、黃美棋同埋魯芬,參與《你是如此難以忘記》MV製作,係Lulu首個擔任女主角嘅音樂MV。
Lulu嘅電視生涯,最早係喺有線電視球彩台《英超有局》做嘉賓,後嚟亦喺now TV嘅互動遊戲節目《撳錢》做嘉賓。2013年8月,佢正式同now TV簽約,做now 101台《球分》嘅節目主持,負責問問題,佢嘅「VT Go!」口號,更成為她嘅標誌。《球分》節目結束之後,Lulu喺now TV主持《巴克萊英格蘭超級聯賽》開波前嘅預告賽事環節。
自成名後,佢嘅背景就被起底。最轟動嘅莫過於被網民發現佢影過裸照。其後,佢喺社交網站表達感受。到2014年中,愈來愈多網民指佢借足球上位,特別係大埔足球隊同阿仙奴。有人更喺Facebook成立一啲反lulu專頁,指佢經常唔接受批評,見到負面留言就即刻刪除。到2014年9月,更有反lulu專頁發現佢曾經為自己個胸作出改圖,更俾多間傳媒雜誌報導。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.