軟件工程
From Wikipedia, the free encyclopedia
軟件工程係一樣好有技巧嘅嘢:例如喺寫一隻軟件嘅源碼嗰陣,軟件工程師會特登喺啲碼嗰度留低啲注釋(comment;指個程式行嗰陣部電腦會忽略嘅碼)嚟解釋段碼係要嚟做乜嘅,等自己第時再想改或者返用段碼嗰時可以一眼就睇得出邊段碼係做啲乜嘅,變相等自己第時做嘢冇咁撈絞-「記得要落注釋」就係軟件工程師成日用嘅一種技巧[4][5];除此之外,軟件工程上亦都有講軟件測試(指搞掂咗隻原型之後試吓隻軟件行起上嚟有冇問題)[1]同埋軟件維護(指喺隻軟件出咗街之後執同改良隻軟件)[6]等嘅工作上要用嘅技巧。
廿一世紀初嘅軟件工程係一門專業:軟件工程師同電腦科學家甚至仲會有專門嘅軟件工程期刊用嚟發表學術文,喺呢啲文嗰度討論軟件工程上用嘅技巧同新諗法,而一個從事軟件工程相關工作嘅人通常都或多或少噉會睇呢啲期刊嘅文,嘗試令自己做軟件工程嘅技術係噉進步[7]。