From Wikipedia, the free encyclopedia
香港濕地公園(Hong Kong Wetland Park)位於香港元朗天水圍北部,有61公頃,包括60公頃嘅戶外保護區同埋1萬平方呎嘅室內展館。作為米埔濕地保護區嘅緩衝區,香港特區政府希望透過起呢個濕地公園嚟保育濕地、教育市民同埋吸引遊客。
香港濕地公園所在嗰塊地原本計劃做生態緩解區,用嚟補償返因為起天水圍新市鎮而冇咗嘅具生態價值土地。1998年,前漁農署(而家嘅漁農自然護理署)同前香港旅遊協會(而家嘅香港旅遊發展局)展開咗一項叫做「國際濕地公園及訪客中心可行性研究」嘅計劃,睇吓可唔可以將嗰個生態緩解區擴展成為一個濕地生態旅遊景點。研究結論係可以喺嗰度發展一個濕地公園,同時又唔削弱佢嘅生態緩解功能。香港濕地公園嘅發展更可以將嗰個生態緩解區提升成為一個集自然護理、教育同旅遊用途於一身嘅世界級景點。香港特區政府之後亦都將香港濕地公園計劃列做其中一個千禧年發展項目。
香港濕地公園喺1999年開始起,係香港第一個收費生態旅遊項目,用咗大概五億港元。公園分兩期發展,總共佔地61公頃。第一期展覽館已經喺2000年12月落成開放,而第二期展覽館亦已經喺2006年5月20號啟用。
公園主要分「室內展覽區」同「戶外展覽區」兩種。室內展覽區裏面由 3 個大型展館(分別係「濕地知多少」、「濕地世界」同「人類文化」)同埋一個戶外公園所組成。除咗展出天然濕地生態之外,公園亦引入咗多種活生生,濕地可以見到嘅動植物嚟展覽,好似馬來長吻鱷、小鼷鹿、三線閉殼龜(俗名金錢龜)、重有香港獨有嘅濕地動物:香港鬥魚、盧文氏樹蛙等。
訪客中心有三個大型展館,包括影音劇場、電腦互動遊戲區,同埋展示唔同濕地生態環境嘅「濕地世界」。
「戶外展覽區」主要有多間觀鳥屋、紅樹林浮橋、濕地探索中心等,可以睇到鳥類、蝴蝶、蜻蜓、豆娘、兩棲類、爬蟲類、蟹、彈塗魚、淡水魚等。濕地公園嘅標誌:黑臉琵鷺,冬季就可以響觀鳥屋外見到。
公園第一期工程曾經獲得香港建築師學會2000年周年大獎會長獎,第二期亦獲得該學會2006年全年建築大獎。
2004年6月喺元朗山貝河捉到嘅小灣鱷貝貝亦喺2006年8月搬咗入去公園入面嘅「貝貝之家」。
貝貝之家簡介:
濕地公園試過買動漫作品嘅授權,用嚟加強宣傳濕地公園嘅活動,包括麥兜、蠟筆小新同阿呢等動漫作品[1][2][3]。
2010-11年度,濕地公園花喺買動漫作品嘅經費係兩萬四千蚊;2011﹣12年度,濕地公園花喺動漫作品嘅經費係八千五百蚊;2012﹣13年度,濕地公園花喺動漫作品嘅經費係一萬五千蚊[4]。
公園嘅入場費係大人港幣30蚊,小童、全日制學生同埋老人家港幣15蚊,三歲或以下嘅小童免費。另外亦都可以申請「家庭年票」,每張港幣50蚊。個人票大人港幣100蚊,小童、全日制學生同埋老人家港幣50蚊。
除咗現金,售票處亦接受用八達通卡、易辦事或公司支票畀錢。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.