亂碼

  提示：呢篇文講嘅唔係亂馬。

亂碼係指電腦系統顯示唔到正確嘅字符，而顯示一啲無意義嘅字符或空白，例如一堆代碼；呢啲所顯示出來嘅文字就係稱為亂碼。

網頁因為缺字（喺爾度係冇漢字字型）而出現嘅亂碼現象
頁面：日文維基百科文章《書体》
對應於粵文維基百科文章《字體》

網頁因為用錯內碼而出現嘅亂碼現象

亂碼本來係指電腦檔案或者程式用嘅內碼唔係用家用緊嘅內碼，所以顯示出錯，後來引伸指所有睇落亂來lyun2 lei4嘅嘢或者亂咗嘅文字。同用錯內碼無關嘅亂碼可以係因為字款缺字、程式出錯、又或者個檔案根本唔係文字等等。

由用錯內導致嘅亂碼喺2020年代基本上已經唔係問題，因為大部分系統已經轉咗用統一碼；喺網上仍然遇到嘅亂碼問題好多時係多次編碼錯誤，屬於無法修復嘅情況。

可能產生嘅原因

用錯內碼

所謂用錯內碼，可以係來源編碼錯誤，或者軟件解碼錯誤；但係呢兩種情形其實係同一個情況嘅兩面。

喺1990至2000年代，因為內碼表示嘅字元數量有限，唔同語言會用唔同內碼。例如，英文用嗰一套字母淨得26個，7位元或者8位元嘅單位元組內碼已經綽綽有餘，但係中文用嘅漢字最少幾千個字，要用雙位元組內碼。因為編碼完全唔同，英文文件拎去中文電腦，就一定會顯示錯誤；同樣，中文文件拎去英文電腦，亦一定會顯示錯誤。呢種因為唔同內碼所以顯示唔到嘅情形，喺中文叫亂碼。

因為可以表示嘅字元有限，唔同用途或者唔同廠商可能會揀唔同嘅字擺喺內碼集入便，結果係甚至同一語言都會出現亂碼嘅問題。例如，當時，喺英文世界，PC、Mac 同類Unix系統用嘅字元集喺高位元嘅128-255位置收字完全唔同；日文當時亦用緊三隻有關聯但係唔兼容嘅內碼。繁體中文當時事實上用嘅係五大碼，但係因為五大碼收字唔夠，唔同廠商都加咗唔同嘅字，結果係五大碼自己同自己都唔兼容^{[註 1]}；另外，中國大陸整排版軟件嘅廠商（例如北大方正）亦唔會用五大碼，而係用大陸自己嘅GB2312再加字，加到佢顯示到繁體中文^{[註 2]}。

喺呢種情形下，瀏覽器好容易會例如將GBK編碼嘅網頁當成係Big5碼顯示，或電子郵件程序將對方傳來嘅郵件錯誤解碼。如果喺發送時編碼錯誤。如果解碼錯誤之後再編碼錯誤，結果可能會無法修復^[1]，需要寄件者嘅電郵程序重新編碼再寄等等。

其他原因

• 字體檔案缺字。
• 文件受到破壞。

可能解決嘅方法

• 轉換編碼。如果係漢字內容一般可以試Big5、GBK、UTF-8（統一碼嘅一種形式）、EUC-JP、Shift-JIS（日文）、EUC-KR（韓文）。喺2020年代基本上已經唔係問題，有啲瀏覽器亦唔再有轉換編碼嘅功能。
• 轉字體。如果解碼正確而出現錯誤文字，可能係有可能係字款缺字，即係字體檔案冇相對應嘅字符，可嘗試換字體。呢種情況喺用 Word 處理英文比㝔常見。
• 如果啲字變咗數字，例如最欣賞相中拉（最欣賞相中拉）等Unicode代碼，可以將呢部分抄低，獨立儲存成html檔案，再用瀏覽器打開解碼。或者可以直接用JavaScript作解讀︰

  alert("最欣賞相中拉");
  

• 有時輸入漢字嘅時候都會出現亂碼，不過呢種情況好少出現。最大嘅原因係輸入法所用嘅編碼，同經編輯器輸出嘅字體編碼不符所致。解決方法係將輸入法設定成編輯器預期嘅編碼，或者將編輯器設定成用輸入法用嘅編碼。

有時解碼嘅方法係要視乎軟件同實際環境，同埋努力嘅嘗試嚟解碼，特別係當你唔知原本用邊個編碼系統。