加拿大五大銀行

加拿大五大銀行^[1]（英文：Big Five）係指資產最多嘅五間加拿大銀行^[2]，依筆劃順序分別係加拿大帝國商業銀行、加拿大皇家銀行、多倫多道明銀行、滿地可銀行同豐業銀行^[3]。真正排名嘅第三同第四之間其實有段距離，以致彭博喺2014年曾經話過加拿大已經冇五大銀行，淨係得返三大^[2]，但係加拿大媒體繼續講五大，甚至六大、七大。

有時講嘅加拿大六大銀行^[4]（Big Six）就指五大銀行再加加拿大國家銀行^[5]；六大銀行擁有嘅資產佔全國銀行業 93%^[6]，六間都被加拿大聯邦政府分咗類做 ｢太大，死咗唔掂｣（too big to fail），受到比細銀行更嚴格嘅規管^[7]。

英文媒體有時會數到七大（Big Seven），但係第七間並唔係排第七嘅滙豐，而係槷sip3喺第五同第六之間嘅 Desjardins，佢喺魁北克省其實大過國家銀行，所以喺魁省亦將佢分咗類做 ｢太大，死咗唔掂｣^[8]，但係佢技術上並唔係銀行，係信用合作社聯盟。

爭議

氣候變化

加拿大五大銀行都支持化石燃料工業，全部名列全球頭20間幫化石燃料工業集資嘅銀行名單入面，2021年雖然口講支持2050年前達至零排放，但係同年對化石燃料工業嘅支持增加咗七成^[9]；2023年，有監管機構定立咗針對呢方面嘅新規定，包括要銀行披露喺全球氣溫升幅低於攝氏 1.5 度以下嘅業績會係點，2024年財政年度開始實施新規定，有上議院議員指新規定唔夠辣^[10]。

支付系統

加拿大曾經試過兩次透過成立法定機構，建立大細銀行都用得嘅電子支付系統，第一次喺1980年代，第二次喺2000年代，兩次都失敗，全國嘅電子支付系統仍然由五大銀行操控，令細銀行、信用合作社、金融科技等等嘅競爭對手都處於不利^[11]。