洛倫茲力

洛倫茲力^[1]（Lorentz force）係指電場同磁場對郁緊嘅帶電荷粒子所施加嘅淨力。由於喺狹義相對論之下，電力同磁力其實係同一種力（電磁力）喺唔同參考系之下嘅表現，洛倫茲力可以話係喺呢個理論下呢種統一嘅力嘅延伸，即係電力同磁力嘅合併。「一粒帶電粒子受嘅洛倫茲力」喺物理學上定義如下^[2]：

${\displaystyle \mathbf {F} =q(\mathbf {E} +\mathbf {v} \times \mathbf {B} )}$

洛侖茲力嘅右手法則；${\displaystyle I}$ 係電流，${\displaystyle B}$ 係磁場，而 ${\displaystyle \mathbf {F} }$ 就係所產生嘅洛侖茲力。

當中 ${\displaystyle q}$ 係嗰粒帶電粒子帶嘅電荷；${\displaystyle \mathbf {v} }$ 係佢郁嘅速度；${\displaystyle \mathbf {E} }$ 係嗰一點嘅電場；而 ${\displaystyle \mathbf {B} }$ 就係嗰一點嘅磁場。喺呢條式入面出現叉積呢樣嘢，「${\displaystyle \mathbf {v} \times \mathbf {B} }$」表示咗一股磁力喺方向上係同粒粒子嘅速度以及個磁場成直角嘅，而且有得用右手法則嚟搵出：將隻右手攤開，手指公指住電荷嘅速度嘅方向（即係電流嘅方向），其餘四隻手指指住磁場方向，手板指住嘅就會係磁力嘅方向^[2]。

洛倫茲力顯示咗磁場會影響電流嘅方向，而噉亦都表示，磁場可以干擾電子架生嘅運作：好似手機同電腦呢啲電子架生係靠精密噉控制住佢哋內部嘅電流嚟運作嘅，如果一部噉嘅架生周圍有個有返咁上下勁嘅磁場喺度，架生內部嘅電流就有可能轉方向，流去一啲唔應該流去嘅地方，輕則干擾件架生嘅運作，重則對件架生造成永久性嘅損害^[3]。