單議席單票制

單議席單票制（英文：Single-seat, single-vote system），又叫小選區制（英文：Small constituency system）、單席選區（英文：Single-Member District），係一種選舉制度，指一個選區淨係得一個議席，只有攞到最高票數嘅人先至可以當選。

「單議席單票制」係香港獨有嘅叫法，其他華人地區會多數叫做「小選區制」。

概要

採用單議席單票制嘅選區，一定要有至少兩個人參選；如果候選人淨係得一個，咁佢就會自動當選，抑或以「等額選舉」嘅方式去選。由於咁樣會導致啲人好易出術，唔使幾多票就當選，所以有啲地區為咗避免呢種情況發生，會另加法例去保障^[1][2]：就好似中華民國嘅《公職人員選舉罷免法》第70條規定，要候選人所得嘅票數一定要到某個百分比，先至成功當選^[3]；而香港就暫時未有法例去保障。

歷史

「單議席單票制」最先響美國實行。1789年，響美國憲法加上咗一句說明：「眾議院應該由州嘅人每兩年選出一位新議員…代表…應該由每個黨平均分派一啲人落唔同州參選。」換言之，美國響當時已經批准咗呢種選舉制度^[4]。1842年，已經有成22個州係用「單議席單票制」。1967年，美國法典第二卷將呢種選舉制度寫入法律，對每個州都授權佢哋用^[5]。

香港以往嘅立法會（嗰時嘅立法局）同區議會係同時採用「單議席單票制」同「雙議席雙票制」（響其他地方超級罕有），分開單議席選區（112席）同雙議席選區（10席），單議席嘅就最高得票者當選；雙議席嘅就最高得票嗰兩個人當選。1988年，立法局改用「比例代表制」^[1]。1994年，時任港督彭定康覺得呢種方式太亂，所以作出改革：區議會所有委任議席取消，民選議席增加到346個；同時取消「雙議席雙票制」，全部一律用「單議席單票制」。之後，香港政府冇就選舉制度做改革，所以就流傳到依家^[6]。

長短處

好處

• 呢種方法可以幫政府建立一個更加穩定同埋有說服力嘅政權^[1][7]
• 如果一個候選人惹起選民嘅不滿，選民隨時會走去投畀第二個，所以啲政黨唔夠膽做啲傷害選民嘅嘢^[8]
• 簡單方便，候選人可以全力投入選舉之中，而選民鐘意投畀邊個就邊個^[9]

壞處

• 雖然呢種選舉方式係簡單，但係好鬼霸道：當選人同在野嘅可能淨係差些微票數，一嚟未能夠完全反映民意，二嚟嗰啲些微票數好有可能係死票^[1]
• 大黨為咗保住選民，多數走中間偏左或偏右嘅路線，對大黨好、對細黨不利，導致其他聲音唔可以入議會^[10][2]
• 黨嘅得票率同實際得票差十萬九千里咁遠。舉個例，就好似2005年英國下議會選舉，當時嘅第一大黨工黨（得票率35.2%，實際攞咗355議席）同第二大黨保守黨（得票率32.4%，實際攞咗198議席）得票率表面係差2.8%，實際上差成157個議席^[11]
• 好難去挑戰政府嘅決定，政府話一就一，反對黨冇得出聲^[2]

用緊呢種方法嘅地方

簡單多數制

• 香港（以前係立法會同區議會都係；依家只有區議會選舉同埋立法會大多數功能組別）
• 英國（英國下議院同埋地方議會）

兩輪投票制

• 法國（法國國民議會、大區議會同省議會）

排序選擇投票制

• 澳洲（澳洲眾議院、州議會同埋聯邦領地議會）
• 巴布亞新畿內亞（巴布亞新畿內亞議會）

混合名額多數制

• 中華民國（立法院【區域選舉】）
• 日本（日本國會【其中六成嘅議席】）
• 韓國（韓國國會【其中八成嘅議席】同埋市道議會）
• 墨西哥（墨西哥眾議院【其中六成嘅議席】）

其他選舉制

• 多數制
  • 簡單多數制
    • 單議席單票制
    • 多議席選區制
  • 比例代表制
• 絕對多輪淘汰制
  • 兩輪選舉制
  • 多輪選舉制
• 選擇選舉制（英文：Preferential voting）
  • 孔多塞標準（英文：Condorcet criterion）
    • 孔多塞法
    • 科普蘭法（英文：Copeland's method）
    • 凱梅尼-楊格法（英文：Kemeny–Young method）
    • 孔多塞輸家（英文：Minimax Condorcet）
    • 納森法（英文：Nanson's method）
    • 排列成雙制（英文：Ranked Pairs）
    • 舒爾茨法（英文：Schulze method）
  • 巴克林投票制
  • 庫姆斯法（英文：Coombs' method）
  • 排序複選制
    • 權變投票制（英文：Contingent vote）
  • 波達計數法

• 非排名方法
  • 同意投票