培生擂台：無敵盃

《培生擂台：無敵盃》（英文：We Are Champs），係香港嘅打拳比賽，由人稱「香港電競之父」嘅鍾培生旗下嘅「培生培心」主辦，分別喺2021年同2023年搞過兩屆。

第一屆（2021年）

第一屆《培生擂台：無敵盃》喺2021年9月18號禮拜六夜晚8點喺九龍灣國際展貿中心匯星搞^[1]，重頭戲係鍾培生本人同話題人物林作嘅對決，畀傳媒叫做「百萬擂台戰」、「林鍾大戰」或者「林鍾一戰」。最後鍾培生以大熱姿態打贏咗林作，但就未有K.O.佢。

拳賽主持係方力申同蔡宛珊，評述員包括拳擊教練鄧子威、無綫電視體育主持何振然同埋藝人梁榮忠，表演嘉賓有Kolor同LMF^[2]，壓軸表演嘉賓係尹光^[3]。

賽程

場次	紅方參賽者	藍方參賽者	規則	勝方
Fight 1	潘啟情 （職業拳擊運動員兼教練）	姚達輝 （職業拳擊同泰拳運動員兼教練）	6回合 3分鐘	潘啟情
Fight 2	温穎琦 （17live主播，《最後一屆口罩小姐選舉》參賽者）	張育玲 （17live主播，《造美人》參賽者）	3回合 2分鐘	温穎琦
Fight 3	吳景聰 （職業泰拳運動員兼教練）	李鑑任 （職業拳擊同泰拳運動員兼教練）	4回合 3分鐘	吳景聰
Fight 4	張致恒 （歌手，前男子組合Boy'z成員）	大J （YouTuber）	3回合 2分鐘	大J
Fight 5	錢師傑 （泰拳教練，1990年代拳王）	李耀東 （泰拳教練，1980年代拳王）	3回合 2分鐘	錢師傑
Main Event	鍾培生	林作	4回合 2分鐘	鍾培生

相關電視節目

• 《鍾培生X林作 決戰前夕》（無綫電視J2台播出）

第二屆（2023年）

第二屆《培生擂台：無敵盃》喺2023年12月1號禮拜五夜晚7點半喺灣仔修頓場館搞，總共有14場賽事，當中兩場焦點賽事包括周永恒對戰霍哥同埋劉馬車對戰龍心：前者最後由霍哥打贏；後者因為劉馬車喺比賽前一日畀警察以涉嫌非禮拉咗而打唔成，由臺灣拳手宗健代替^[4]。大會司儀係李賢。