基因多樣性
From Wikipedia, the free encyclopedia
Remove ads
基因多樣性，又名遺傳多樣性，係指一個物種或者種群之中，包含咗幾多基因變異喺入便。喺遺傳學同生態學上，基因多樣性一般認為係生物多樣性嘅重要層面，對物種適應環境變化、生存同埋進化都有關鍵影響[1]。
基礎
睇埋：基因
基因係 DNA 入面一段段特定嘅序列，儲存住隻生物嘅遺傳資訊，呢啲資訊會決定隻生物點樣生長、發育、運作同繁殖。雖然同一物種唔同個體之間嘅基因大部分都係一樣嘅，但個體與個體之間都可以有細微差異，例如有啲人眼係啡色，有啲係藍色，就係因為基因入面有唔同嘅等位基因。呢啲差異就造成同一物種或者同一個種群內部嘅基因多樣性[2][3]。
影響
基因多樣性有幾個明顯嘅好處[4]：
- 提高適應力：環境改變嗰陣，例如氣候變化、出現新病毒，有基因多樣性嘅種群，實會有其中一啲個體更能夠適應新環境，令個種群整體嚟講更加容易生存。
- 抵抗疾病：基因組合愈多樣，單一一種病毒或者疾病就愈難一吓過影響晒成個種群。
- 促進進化：自然選擇係進化嘅重要機制，講緊喺同一個種群入面，某啲個體因為擁有較有利嘅基因組合，可以喺特定環境下生存得更好，繁殖生更多後代，從而令呢啲有利基因慢慢喺下一代度變得愈嚟愈普遍。不過，自然選擇嘅前提係要有一定程度嘅基因多樣性：即係種群入面要存在唔同嘅等位基因，先至可以有得「揀」。如果所有個體基因都一樣，噉環境點變都唔會有個體喺基因上有特別優勢，自然選擇就冇得發生。換句話講，冇基因多樣性，就冇進化可言。
不過，基因多樣性都唔一定永遠有利。基因多樣得滯有時可以導致：
- 一啲不利突變：部份基因組合可能會導致疾病或者功能異常。
- 難以保持穩定性狀：例如，喺人工育種入面，過多嘅基因變異可能會令某啲期望嘅性狀（如大粒果實）難以穩定遺傳。
Remove ads
心理
喺行為遺傳學同心理學研究入面有唔少證據顯示，性格特質（例如外向度等）都受到基因影響，而基因多樣性就係造成呢啲差異嘅其中一個來源。唔同人喺同一性格特質上可能有唔同強度，同樣都係因為體內帶有唔同等位基因。研究發現，即使係孖胎，都未必擁有完全一樣嘅性格表現，其中一個原因就係微細嘅基因差異。基因多樣性亦解釋到點解喺同一個環境下，人與人之間仍然可以展現出高度唔同嘅行為模式。從進化嘅角度睇，性格多樣性有可能係適應環境變化嘅一種策略，有助維持種群整體嘅生存彈性。
睇埋
引咗
Wikiwand - on
Seamless Wikipedia browsing. On steroids.
Remove ads