學者症候群

學者症候群（粵拼：Hok6 ze2 zing3 hau6 kwan4；英文：Savant syndrome）係一種人類智能嘅現象，指一個人喺認知上有明顯嘅缺陷，但係就喺某一兩種認知能力上遠超常人^[3]。例如有研究者剖析啲人點樣學語言，搵到有啲個案係有個特殊嘅人，佢連著衫等嘅基本自理都要人幫，但就能夠流利噉運用 20 幾隻語言－呢個噉嘅人就畀人嗌佢做語言學者^{[歐 3][4]}。

學者症候群
同義詞	自閉學者、白痴學者[註 1][1]
金·撇卡[歐 1]揸住本書嘅相； 佢係一個出名嘅「記憶學者」。
病徵	普遍嘅認知功能障礙，同時喺某啲方面嘅能力遠超平均嘅水平[1]
類型	可以係天生嘅，但有啲似乎係後天嘅[2]
起因	自閉症譜系[歐 2]等嘅神經發育障礙、腦損傷[1]
盛行率	每 1,000,000 個人當中就有大約 1 個[3]
分類同拎
醫學專科	精神醫學, 神經內科

定義

睇埋：智商、弱智、天份、學者同特別興趣

定義上，學者症候群有兩大重點特徵^{[5]:p. 1}，如果話某個人有學者症候群，即係話佢：

1. 認知能力上有缺憾－例如：IQ 明顯低過 100（而智障定義上係 IQ 低過 70）（唔一定係標準化測試既智商分數，可以係講緊佢整體智力低過一般人）^[6]；
2. 同時，佢又喺一兩個領域上能力極高（特殊才能），遠遠超越人類平均水平，而佢嘅超人才能，明顯同佢「有認知能力缺憾」呢點唔夾，當中佢嗰樣特殊才能可以係
   • 遠超正常人嘅水平；或者
   • 遠超「由佢 IQ 數值會預測」嘅水平。

有研究者主張，學者症候群未必係二元咁簡單嘅：一個人唔係話「一係有學者症候群一係冇」，而係「有幾高程度嘅學者症候群」－就算係 IQ 70 或以上嘅一般人，都成日會或多或少噉有「喺某一兩種能力上超乎常人」嘅情況；啲出名嘅學者症候群個案，只不過係喺呢點上好極端－嗰個人可能連沖涼等嘅日常自理都搞唔掂，但齋講佢專門嗰範嘅話就似個天才^[5]。

要釐清返嘅係，廿一世紀初英文 savant（近似粵拼 saa6 faan1）講緊嘅，同 scholar（喺高等學府度做研究嗰啲學者）係兩個差天共地嘅概念。除非另外講明，否則篇文以下嘅部份學者一詞一律係對應英文 savant －指有認知缺憾但某一兩樣能力極高嘅人。

個案

睇埋：超憶症

認知心理學同神經內科方面嘅專家，都有落力去搵學者症候群個案返嚟研究。响美術、音樂同語言等嘅多個領域當中，都可以發現學者症候群嘅個案。

金·撇卡^{[歐 1]}（1951-2009 年）係學者症候群嘅一個出名個案。撇卡係個美國人，佢一出世嗰陣個腦就有缺憾，搞到佢小腦^{[歐 4]}受損而且個腦少噉咗腦樑^{[歐 5]}。撇卡去到成 4 歲先至學識行路，由細到大都唔識得扣鈕，而且大個咗都管理唔到自己嘅生活，要佢阿爸照顧－撇卡嘅普遍能力顯然比唔上一般人^{[註 2]}；不過，撇卡嘅記憶力非常出眾，紀錄指撇卡能夠喺 1 個鐘頭 25 分鐘內睇完十幾萬字長嘅英文長篇小說，能夠喺 4 個月後準確記返起其中一個角色嘅名，仲講得出嗰個角色喺邊頁出現過同埋講過啲乜對白；撇卡一世人睇咗起碼 9,000 本書，能夠喺 8 至 10 秒內睇完一頁而且對啲內容過目不忘，事後會近乎完美噉記住本書嘅每一隻字。撇卡因為佢嘅超凡能力而出咗名，佢嘅故仔仲有畀人改編做戲^[7]。

睇埋

• 自閉症譜系：事實表明咗，有自閉症譜系病症（例如亞氏保加症）嘅人，比較容易出現學者症候群；自閉症譜系嘅人成日有興趣狹窄嘅行為，即係淨係對一兩樣特定嘅嘢有興趣；有研究者話，呢種行為會令患者係噉勁做自己有興趣嘅活動－例如勁喺度畫畫或者勁搜集某啲物品呀噉，同時又會令患者忽略嗮其他嘢，噉就會助長學者症候群產生^[8]。
• 多元智能
• 天才
• 專家
• 研究

註釋

1. 唔少人覺得呢兩個名帶有侮辱意味。
2. 但係有報告話撇卡做過 IQ 測試，結果攞到 80 幾分，唔算智障。

歐詞

1. Kim Peek
2. autism spectrum
3. Language savant
4. cerebellum
5. corpus callosum