小欖精神病治療中心

  提示：呢篇文講嘅唔係小欖醫院。

小欖精神病治療中心（英文：Siu Lam Psychiatric Centre），舊名小欖精神科監獄，坊間仍慣叫做小欖監獄，係香港懲教署轄下嘅一座高度設防囚禁用建築物，名義上用來圂着兼醫治有精神病或心理問題嘅罪犯，不過因屢屢傳出醜聞而臭名遠播：包括其中嘅囚犯被酷刑對待及／或離奇暴斃，而爾尐受害者有毋少係由於政治原因被擺入去嘅，神智（原本）毫無異常跡象。^[1][2][3]

小欖精神病治療中心東面

小欖精神病治療中心西南面

虐待囚犯

2002年，立法會保安事務委員會開特别會議，三個釋囚指控懲教署職員違規傷害囚犯——喺第二處得罪監獄醫生、想向巡視嘅太平紳士投訴被獄警打，結果都可能係會喺小欖精神病治療中心俾人拮懵仔針；無醫生處方都照拮^[4]。

2002年，申訴專員公署嘅報告證實，小欖精神病治療中心喺1980年代用懵仔針處分犯人，負責醫生亦無加簽用藥報告，前懲教署職員、前元朗區議員周永勤亦都有佐證，前立法會保安事務委員會主席劉江華就批評，話呢個問題一路都無改善^[5]。

2017年，參加反新界東北撥款示威嘅社運人士梁穎禮，試過兩次俾人困入小欖精神病治療中心。第一次係臨床心理學家同佢傾到咁上下，就主動叫佢講出值得尊敬嘅搞抗爭嘅人嘅名，梁禮穎不虞有詐噉樣響咗甘浩望神父同行為藝術家程展緯兩個朵之後^[6]，學家即刻扑鎚嘅；喺單人囚室踎咗十日之後，小欖精神科醫生簽紙放渠去之前住開嘅監獄。四個月之後無啦啦又俾人踢入去，住喺雙人囚室，要去工場做嘢。渠話，間嘢入邊唔止囚犯精神唔妥，就連職員都跳跳哋；又見過有囚犯被拮咗懵仔針，意識清醒而控制唔到身體，坐喺度流澌口水；相信隻藥搞壞咗個腦，後來重有沉鬱、暴燥傍唔同人講嘢等等以前無嘅唔妥表現……渠最後得到精神科醫生簽紙證實渠無精神病，先至走得甩。

2020年9月，立法會議員邵家臻指，人稱「畫家」嘅反修例運動抗爭者潘浩超，由於喺示威現場掟雞蛋同鬧差人被捉，已經俾人困喺小欖精神病治療中心入面14個月，期間俾人打過懵仔針，又唔畀及時見醫生；似乎都唔啱規矩^[7]。法官劉綺雲喺同年11月判劉收監21個月，判詞入面無提及個決定有精神病相關嘅考慮。^[8]

喺參加反修例運動而俾政府拉咗嘅之中，有其他人都喺小欖精神病治療中心入面踎過；法官憑自己判斷，將個無精神病嘅小學教師判入小欖精神病治療中心收監；註冊社工劉家棟，被判困喺第二處……渠呢個長期食開藥嘅抑鬱症病人，話當要求獄警畀渠繼續食藥，就被轉咗去小欖精神病治療中心度困，依然唔准食藥，就連渠交出來嘅醫生紙都當無到……唔係單獨囚禁［每日只得15分鐘放風（喺間房外面過，已經包咗沖涼時間），其餘就只得職員送飯嗰刻會見到其他人］就係同騷擾性好大嘅精神病人住埋一齊，間房仔同床舖都好污糟，無窗無光線，臭肨肨，馬桶唔係全日無停噉沖水嘈生澌，就係積住屎尿無得沖；有傳媒叫小欖精神病治療中心作「政治犯黑獄」^[9]。

離奇死人

• 2001年，26歲張志堅喺入面暴斃。2002年死因研訊，發現渠條屍有好多唔尋常嘅針窿，身體入面嘅懵仔藥含量又高到出奇，比正常醫病時嘅濃度高唔止十倍^[10]，好可能係俾懲教署嘅人打懵仔針毒死；其他疑點包括職員唔畀探訪、閉路電視影到獄卒揸住件可疑嘢喺渠隔篱，兼夾似乎喺關鍵嗰兩日壞機，錄少咗幾個鐘，之後又似乎經唔正常程序，整返好^[11]。2003年，保安局交咗專家報告畀立法會，引證好可能係由於渠濫藥，有糖尿病兼醫得唔妥當而無命；之後政府無再開死因庭深究，就噉樣以「死因不明」蓋棺定論^[12]。
• 2007年2月，一名46歲姓陳犯人，朝早約7點，昏迷嚮囚室，送去屯門醫院，延至8點證實死咗，由死因庭研究死因。死者係嚮2007年12月因為遊蕩罪被捕^[13]。
• 2007年9月，有個犯人嚮中心死咗，懲教署通知警方。死因裁判法庭開庭研究死因。當事人係54歲男人，因傷人罪還押小欖精神病治療中心。夜晚約10點，昏迷死嚮囚室地，原因未明。
• 2019年12月，有傳媒報道，最近有大量警車押犯人進出小欖精神病治療中心，線人估計嗰啲係反政府抗爭者，喺入邊俾人打懵仔針同埋（/或者）殺死，再秘密運走^[14]。懲教署否認又譴責，話嗰排喺裏面嘅囚犯人數並無大幅增減；而每當渠哋之中有人死咗，都會交畀差人同死因庭查^[15]。
• 2020年10月8日，54歲黎民十喺小欖精神病治療中心入面受傷，第二日死喺屯門醫院度。獄方話渠係自己用長褲纏頸自殺個喎，認屍嘅林國璋牧師引述法醫官見解——係勒頸，唔係上吊，警方就同法醫講話爾單嘢無可疑^[16]。瞓街嘅渠，喺2月俾差人捉咗，當時疑似受到施暴。邵家臻跟緊呢單嘢，話渠同街友都覺得個死法好可疑——照計未到時候派長褲；又無動機……叫康文署交出拉人時嘅閉路電視影片，就俾警方閘住咗；問懲教署條疑似用來自殺嘅長褲點來，又無答——就話已經交咗畀差人同埋死因裁判法庭去查^[17]。

碎料

• 「四個大字」係香港監獄行話，用來叫同事將囚犯困入小欖精神病治療中心^[18]。（實際代表焉四個字或者係唔係代表四個字？有待考證……）

交通

• 九巴
  • 52X，至旺角柏景灣
  • 53，至荃灣如心廣場
  • 61M，至荔景站
• 隧巴
  • 962，至銅鑼灣