展拓香港界址專條

《中英展拓香港界址專條》 （英文：Convention between Great Britain and China Respecting an Extension of Hong Kong Territory）係響1898年6月9號，由大清同埋英國響北京簽訂。

中英展拓香港界址專條

專條內容係，英國向清廷租借香港九龍界限街以北、深圳河以南嘅地方，同埋附近包括大嶼山等二百幾個島，將香港境址擴展到后海灣同大鵬灣，為期99年，直至1997年6月30號為止。不過，清政府同時間保留九龍寨城嘅管治權，兼且繼續喺九龍寨城派駐官員。

建議

專條地圖，初地界係沙頭角河同深圳河口

修正後係沿沙頭角河同深圳河

擴展九龍界址，係1894年由遮打向港督羅便臣提出嘅^[1][2]。

當時香港島同九龍半島無險可守，香港個港亦唔係全個喺英治之下，有部份係大清。一旦其他敵對歐洲勢力打入香港，又或者喺大嶼山等島駐紥，到時會無得守。而且當時香港島有人口密集，鼠疫橫行，需要分散人口減低風險。同埋，香港島同九龍半島亦都無可能糧食自足，重有係工業亦要地發展^[2]。

之後由The Chamber of Commerce、The China Association同埋The Navy League力推，尤其係後者^[1]。而英國海軍同陸軍都有份提防務意見^[1]。港督羅便臣推動英國政府^[1]。而英國駐華公使竇納樂（Claude MacDonald）同大清打交道^[1]。

談判

1898年3月，俄羅斯帝國迫大清租旅順同大連共25年，引起英國不安，所以英國借勢迫大清租威海衞同等年期，7月1號簽《訂租威海衛專條》。同時訂下如果廣東、廣西有任何租借地，會另要求租地以求平衡。同期3月，法國想染指廣東、廣西，4月迫大清租廣東西部嘅廣州灣。英國乘機以平衡勢力為由，竇納樂迫大清畀英國擴址200英里，6月9號簽下《展拓香港界址專條》，租99年。之後11月16號，大清亦迫住租廣州灣畀法國。

移交

香港總督接收新界公告

1898年6月9號簽訂之後，香港本埠並無即時公告^[1]。10號，香港本地仍然未知結果，會否全部抑或部份^[2]。

英人並無即時收地，而係等到調查完，勘定界，諗定方針先做，先至收。原因定喺1898年4月17號正式接收，因為鄉民開打新界六日戰，結果提早一日，喺4月16號，喺九龍城同大埔升旗接收新界。

影響

睇埋：香港主權移交

响專條約滿後，英國理應歸還新界，可惜大清政府早已滅亡，專條本應由中華民國政府繼承。但係，英國响1950年承認由中華人民共和國政府代表「中國」，並且同中華民國政府斷絕外交關係，重因為1971年，聯合國大會通過聯合國大會2758號決議，中華人民共和國政府取代中華民國政府，做咗聯合國唯一嘅代表政府，同埋聯合國安理會五大國之一，加埋1972年中英建交，因此，英國向中國就香港主權展開談判。

1970年代中期，香港商界開始留心專條約滿嘅問題，擔心港府批出嘅新界土地契約可唔可以跨越1997年，同埋港府涉及新界嘅土地契約响1997年以後重係咪有效^[3][4]。

1979年3月，租約將喺少於20年屆滿，為咗解決土地契約嘅問題，時任港督麥理浩爵士首度訪華，引伸出後嚟嘅「香港前途談判」。