崙頭

23°4′43.7″N 113°22′19.2″E

1929年廣州市全圖嘅崙頭村

崙頭（粵拼：leon4 tau4）係廣東廣州一條村，舊時屬番禺縣彬社，家陣屬於海珠區官洲街道管。隔崙頭海對住官洲，西北邊連住北山，有成三百二十九萬方咁大。元朝後期開村。村民姓莫、黎、陳。

村後邊有五座山，即係聖堂崗、崩崗、睡獅崗、後底崗、沙螺崗，個樣分別似旗、鼓、獅、象、印。聖堂崗除咗似旗，仲似個「崙」字，亦係最高嘅山（海拔60m，海珠區最高點），所以呢條村就叫「崙頭」。

街約分佈

崙頭村基本保存咗古代里巷嘅佈局，成條村有七個坊：

• 南約
• 東約
• 西約
• 北約
• 上中約
• 下中約
• 莫街

古蹟

神廟

名	始建	重修	現況
聖堂古廟	未知	康熙四十年（1701年） 乾隆五十年（1785年） 同治十年（1871年）	無咗
華光古廟	未知	乾隆三十八年（1773年） 嘉慶二十二年（1817年） 同治二年（1863年） 光緒十六年（1890年）	無咗，有華光輿遺存
崩岡天后廟	乾隆十二年（1747年）	咸豐三年（1853年）	無咗
文閣	乾隆十三年（1748年）		無咗
武閣	乾隆十三年（1748年）	光緒十八年（1892年）	無咗
聖逕天后廟	未知	乾隆六十年（1795年）	無咗
三官廟	嘉慶二年（1797年）		無咗
財神廟	嘉慶十六年（1811年）		無咗
觀音廟	光緒三十一年（1895年）		無咗

祠堂

名	堂號	主祀	地址	現況
黎氏宗祠 （始祖祠）	敦本堂	始祖（東軒）	啟明坊	海珠區文物保護單位
存逸黎公祠 （存逸三世祖祠） （北廳）		三世（存逸）	村北	暫無定級
存盛黎公祠		三世（存盛）		拆咗
南溟黎公祠 （南溟祖祠）	潤澤堂	四世（南溟）	啟明坊	廣州市文物保護單位
德存祖祠		四世（德存）	街市前	海珠區不可移動文物
序季祖祠		四世（序季）		暫無定級
雲壟祖祠		五世（雲壟）	中約直街	海珠區不可移動文物
雲閣黎公祠 （雲閣祖祠）		五世（雲閣）	中約直街	拆咗
月江黎公書室 （月江祖祠）		五世（月江）	中約直街	海珠區不可移動文物
月台黎公祠 （月台祖祠）		五世（月台）	啟明坊	拆咗
懷川書室 （懷川八世祖祠）		八世（懷川）	街市前	暫無定級
果軒家塾		八世（果軒）	中約直街	海珠區不可移動文物
靜觀黎公祠	君和堂	靜觀祖		暫無定級
慕南黎公祠		慕南祖		暫無定級
日昭黎公祠		日昭祖	村託兒所	拆咗
爵昭黎公祠		爵昭祖		拆咗
旦陽黎公祠		旦陽祖		暫無定級
心宇黎公祠		心宇祖		暫無定級
遠耕黎公祠		遠耕祖		暫無定級
興唐公祠		興唐祖		拆咗
會唐書室		會唐祖		暫無定級
葉山書室		葉山祖	街市前	拆咗

其他

• 遠景流徽村牆：清朝啲海盜好狼死，於是乾隆三十七年（1772年），村民喺東南起村牆，叫「遠景流徽」。道光二十年由頭起過。咸豐二年，修整兼延長北門同西門一帶嘅圍牆，等佢哋聯埋一氣。
• 南山鎖鑰：門樓。喺中約直街。
• 仁厚里：門樓。喺中約直街。
• 崙頭鄉約：喺後底崗下低。
• 社稷之神祭壇：喺後底崗下低。
• 黎氏祖墓群：喺後底崗，係崙頭黎氏始祖墓。
• 進士第：清朝進士黎崇基故居。崙頭村堅守「重德明教」嘅古訓，讀書風氣盛极一時。明朝嗰時村裡邊出咗好多人才，到咗清朝，崙頭黎氏家族代代都出精英。其中，黎氏十七世黎崇基進士最巴閉，考過殿試。最神奇嘅係，崙頭黎氏家族喺清朝先後有三十二個人入讀國子監。
• 崙頭民居：民居基本上都係石腳青磚鑊耳屋。喺平面佈局上，特征係三間兩廊一天井、側房木閣樓。多數民居用花崗岩石條砌牆角、門框、窗框，鋪天井地。門檐保留灰塑山水、花卉、蝙蝠圖案，山牆外塑山花、卷草圖案裝飾，屋裡面有磚雕神龕，天井、門口墀頭磚雕裝飾精美。

特產

崙頭物產以水果爲主，有臍橙、甜橙、糯米糍荔枝、尚書懷荔枝、桂味荔枝、紅果楊桃等。崙頭村土地五千畝，有三千幾畝種水果。崙頭水果生意最鼎盛時期，係清朝同光年間，除咗賣去省城之外，重賣到去新加坡。二十世紀三十年代，廣州市舉辦柑桔展，成個賽區唯一嘅臍橙就係崙頭嘅，卒之崙頭攞第一。

交通

搭車

• 車：264路、264A路、B25路
• 車站：崙頭村委站、崙頭立交站、中華姓名博物館站、崙頭總站

輪渡

• 官洲碼頭—崙頭碼頭

隧道

• 崙頭-生物島-大學城隧道

參考資料

• 《廣州市文物普查彙編》
• 《海珠古祠堂》
• 《崙頭村史》
• 《崙頭黎氏族譜》