希伯來字母

希伯來字母（希伯來文：אָלֶף־בֵּית עִבְרִי，羅馬化：alef-bet ʿIvri^{[註 1]}）係拼寫希伯來文嘅輔音字母，有22個，唔分大細楷，寫字嘅時候係由右到左打橫寫。22個字母當中嘅其中5個喺字尾（字嘅最左便）嘅時候會唔同寫法，不過如果個字得一個字母就唔算數。而今用緊嘅除咗正楷字母之外，仲有一套手寫用嘅 ｢潦草｣ 字母。

希伯來字母文本

舊約聖經《以西結書》嘅希伯來文文本；希伯來文慣常用希伯來字母寫。

希伯來字母

而今用緊嘅正楷字母其實唔係古代本來用開嗰套，而係喺公元前三世紀嗰陣，當以色列變成波斯帝國嘅猶大省嘅時候，由當時嘅波斯官話阿拉米文成套借過來，本來叫做 ｢亞述字｣（希伯來文：כְּתָב אַשּׁוּרִי，ktav Ashuri），但係而今一般人只會叫佢做 ｢方塊字｣（希伯來文：כתב מרובע，ktav merubaʿ），因為成套亞述字借過來用嗰陣，為咗廢事令人反感，已經將套字改咗名。而今一般人唔會識睇古希伯來字，^[1] ｢亞述體｣ 亦都只係指宗教典藉用嘅一種書法字體或者印刷字體。

希伯來字母亦都用來寫依地文。

字母一覽

名[註 2]	類似粵讀	正楷		潦草		數值	古體
		喺尾	唔喺尾	喺尾	唔喺尾
alef	aa1 le4 fu̷4	א				一
bet [註 3]	bet1	ב				二
gimel [註 4]	gi1 mou4	ג				三
dalet [註 5]	daa1 let4	ד				四
he	hei1	ה				五
vav	waa1 fu̷4	ו				六
zayin	saa1 jin4	ז				七
het	het1	ח				八
tet	tet1	ט				九
yod	jot1	י				十
kaf [註 6]	kaa1 fu̷4	ך	כ			二十
lamed	laa1 met4	ל				三十
mem	mem1	ם	מ			四十
nun	nun1	ן	נ			五十
samekh	saa1 mek4	ס				六十
ayin	ngaa1 jin4	ע				七十
pe [註 7]	pei1	ף	פ			八十
tsadi	caa1 di4	ץ	צ			九十
qof	ko1 fu̷4	ק				一百
resh	re1 syu̷4	ר				二百
shin [註 8]	sin1	ש				三百
tav	taa1 fu̷4	ת				四百

希伯來數字

内文：希伯來數字

希伯來文嘅字母可以當數字用，用法有啲類似中文，但係要避忌上帝嘅名，另外因為百位嘅字母只係去到四百，所以寫七百以上局住要重覆用一啲字母，但係應該儘量減少重覆。至於一千以上，一千萬以下嘅數就要配合撇（׳，geresh）符號，拆兩組寫。希伯來數字已經唔常用，最常見係用來寫日子。

筆順

同中文一樣，手寫希伯來文都講筆順，例如頭兩個字母嘅潦草係咁寫至啱：

	（右到左） 第一個字母 א 右面起筆，逆時針打半個圈之後提筆，之後先寫左面嗰楝
	（右到左） 第二個字母 ב 左面起筆，順時針打四分一個圈之後䟴筆，向左打橫之後䟴筆收筆

元音

雖然希伯來字母原則上係輔音字母，但係​——​特別係依地文同現代希伯來文​——​實際上，某啲元音喺某啲情況下係會寫出嚟嘅，方法係有幾個字母喺某啲情況下可以表示元音，只係睇唔慣唔會睇得出係元音定輔音。

註

1. 希伯來文有唔同嘅羅馬字拼音方案，並唔統一，冇任何一種係通用；咁拼係其中一種可能遇到嘅拼法，仲有第啲拼法。
2. 呢個表用嘅係統一碼用嘅羅馬拼音，唔係以色列官方嘅標準羅馬拼音或者民間嘅其他羅馬拼音，見 "Hebrew" (character code chart). The Unicode Standard (第15.0版). Unicode, Inc. 喺2022年9月16號搵到.
3. ב 有兩個讀音，要分嘅時候有點嘅 בּ 叫 bet, 冇點嘅 ב 叫 vet
4. 喺古典希伯來文同一啲現代方言，有點嘅 גּ 同冇點嘅 ג 唔同讀音
5. 喺古典希伯來文同一啲現代方言，有點嘅 דּ 同冇點嘅 ד 唔同讀音
6. כ 有兩個讀音，要分嘅時候有點嘅 כּ 叫 kaf, 冇點嘅 כ 叫 khaf
7. פ 有兩個讀音，要分嘅時候有點嘅 פּ 叫 pe, 冇點嘅 פ 叫 fe
8. ש 有兩個讀音，要分嘅時候右面有點嘅 שׁ 叫 shin，左面有點嘅 שׂ 叫 sin